Boquerizu - Asturias

Los mas de los dias-digo yo pa contra mi-, ¿habria siu yo la quéro, si cada mañanina non veyera´l Monte´l Cuera? É lo primeru que hago cuantis despierto: asomar a velu. Paeme qu´habia dálcontrame h.artu amuniada si asomara a la ventana un dia y non lu h.allara... É pa mi como una sombra, como un acubiciu, paez qu´ampara de males a tou el valle, que tomara los malos vientos y las malas ñubes. Non me pasa por vez non lu amiro cada dia, y cada dia h.allonelli algo distintu y nuevu.
Hai dellos dias en que paez que va a cuntar un misteriu, ta engueltu nun gris brumosu, cola picotera atapada po la ñube y una raya lisa pelas mañangas. Entós paeme que la contando quúna xana engatusó anoche daqué mozu o que la Gëstiga andaba ayeri a las tantas per entri argumas y los árboles negros que quedaren dúna quema _las quemas... Pel inviernu los pastores préndelas, y pela noche viamos de crios calecese al par déllas a los criaos de los Reyes Magos... Asina diz la ente: esi "ve la herba crecer en Cuera", cuando algunu ve mas de lo qu´hai.
Cuando-y da perehí, amanez gallasperu h.aciendo-y guiños al solin acabáu de salir; é cuando l´aire ta llimpiu y las picoretas Turbina,la Pica H.aba, Lillo, Moreda, Peña Blanca pinchan p´arriba nel cielu azul, y siéntense los lloqueros del ganaú en paz, Que h.uerte, que brillosu vese nesos dies...
Ayeri al yo asomame, amirélu y h.allelu llenu de nieve, la víspora estevo tapáu toul dia, como si asmara algo y al destapase apaeció con un vistiu blancu llenu de pintas negras,las sos h.ayas -las que-y quedan al probe- y que son el so orgullu...
El Monte´l Cuera tien un h.iyu y casi diríavos qu´un nietu.
El h.iyu ye Texéu y el nietu, Soberrón. Texéu no llargu estírase toulo que puede quisiendo llegar a onde´l padre Cuera; vas siguiú de´lli (dexando atrás, entre los dos namás, qu´un vallin verde y estrechu), pero ni a lo llargu ni a lo altu é como so pá, ni tan siquiera tien la mesma collor.
El Cuera é oscuru, arboláu, h,uerte, da respetu, nel inviernu,encanez cola nieve.
Texéu, ensugu yá de los texos que-y dieren el nombre, non tien más que´erba y piedras, verde y blancu. Pe´l otoñu. a lo más, sálen-y las manchas apartadas de los h,elechos secos. É tan pindiu p´arriba que tien qu´estribar nas cuestas y en Soberrón pa non dir deh.ocicos...
Soberrón como una campanona posada en suelu, aunque -y lllamemos nietu, é vieyu y tien h.artos cuantos que cuntar...
Esgatuñando per ellí, esborregóse un rapaz va años, y non habia haber siu´l primeru...
No mas altu del so cumbrial hai, dizque, un castiellu caidu que h.icieren los romanos... Nuna cueva d´allí riba cuntan que vive albentestate una mora vieya que, cada y cuando, echa la torta.
Si vedes una ñublina blanca acostada a lo llargu qu´empicipia no altu del Soberrón, é ´l h.umu del h.ueu que prendió la mora pa la so borona. Esi dia, por más guapu qu´esté, a la tardina llueve. É una mora agueyetada que dura h.astasaora donde de nantes del re Pelayu.
Cuantos cuentos cunta´l monte aque-ý los quier udir...
A mi gústame muchu quedame amirádolú y udiéndolu, y to de lo h.acer h.asta que los deprienda toos.

De la escritora llanisca PILAR JUNCO