Foro- Ciudad.com

Boquerizu - Asturias

Poblacion:

11-04-08 12:57	#806119
Por:L´ ASTURIANINA
¡ Ni con muchu ! No hay tierra en ninguna parte que se compare a la nuestra. Ni ´l Canu, que jo ´l primeru que dió pe ´l mundiu la güelta, topó nunca en so camín un quiñón que se i paeza, pos cuando quiso ´l Siñor echar mano pa jacela cuntan que descacipió, con soberana llargueza, tou lo mejor y más maju que jalló en sos fatriqueras pa que jora, asina dixo, la más guapa del planeta. Y esto cuntólo Maneu, que no lo dixo cualquiera, pós, com´elli é tan lleíu y hombre de saber y cencia, diz lleyolo ´n una historia qu´ellí tien y así lo reza. Y, ya se ve, tien razón, pos ¿qué valen a so vera las cinco partes del mundiu y xuntas las dos Américas que sin pinta de sentíu tantu la xente apondera? Lo que la surnia pa ´l gatu, y el pitu al par de la nuétova. ... Cuando llena d´esperanzas asoma la primavera y va tapinando el suelu, qu´a morru un palmu no dexa, d´aquella herbina menúa que flecu paez de seda y de flores espolvoría el pumar y la campera, ¡qué preciosu panorama ofrez al que lu contempla y embebecíu al miralo queda con la boca abierta! Por todas partes hay flores, dondequier la planta medra. Entre el tomillu y la grama vese la flor de la abeya; rosas, lirios, catasoles, de pan y vinu las jueyas, la malva, la manzanilla, l´hortelana y la verbena; pe ´l naranjar y el alloru esguila l´enriadera; las campanas y el poleu ajuracan las pareas; los bardios y las jortigas no dexan libre caleya; el rumiu está revestíu de verde y frondosa yedra; cerca el anabiu las pozas, el mofu aforra las peñas y jasta ´n cima ´l teyau crecen abondu jelechas. SIGUE.......
Puntos:0

11-04-08 13:27	#806212 -> 806119
Por:L´ ASTURIANINA
RE: ¡ Ni con muchu ! Corre l´agua cristalina de las juentes marrulleras, y s´estiende per las brañas y s´encuelle per las riegas y s´arie co las flores que sus bordes ribetean y gorgolita ´n os joyos, y con los guixos enrieda y rebizca co las ramas que, jaciendo muchas muecas, calúmbase n´a corriente cuando l´aire las solmena, y vien jaciendo veyuras jasta que a la mar allega. ... ¿Y pel veranu? ¡Dios míu! ¿Quién pa tántu tien cabeza? Cuando maduran los frutos y n´el prau l´herba se siega y se resalla el maiz y va la xenti a las fiestas y bailan, si hay que bailar, al son de la pandereta, lo mesmu chicos que grandes, lo mesmu mozas que vieyas? ... ¿Pos, qué diré del otoñu cuando los macios esmuegan y se cuellen las manzanas y se dimen co la piértiga los castañeros aricios y la playa s´engabiella y s´escapulla el maiz jaciendo doradas riestras? ... ¿Y ´n el inviernu...? Dexame, que quió sosegar la llengua, porque no acabo esti añu si parllo de las pulientas, de la borona preñá, del turrón de Noche-güena, del untosu matacíu, del llacón y la morciella, de cuando está la mar mala y el monte enteru blanquea y al redior de los tizones s´engorruña la reciella y la güela cunta un cuentu mientras jirve la caldera. ... Agora, en cuantu a cantar, ¿quién i pon la zancadiella? pos n´Asturias todo canta, como ya dixo un poeta, é Italia no val dos pitos si á cantar se pon con ella. ... Canta el cericu volando d´aquí p´allí tras la jembra; canta ´l miruellu n´a rama en que no nieru s´esmenga; abre ´l xilgueru so picu pa cortexar la xilguera, y dexa vizgu so cantu al mejor cantaor qu´eba; canta el raitán y el malvisu qu´a toos á cantar apuesta, y el verderón, la papina, el chuvíu, la pisandera, la callándriga, el gurrión, el cuquiellu y la corneya, el sapu y el salta praos, el chogu y la carbonera. El grillu está ri que ri de so palaciu á la puerta de día igual que de noche sin esalendar siquiera. Jasta ´l cocaraxu canta cuantas la tardi pardea. SIGUE .......
Puntos:0

11-04-08 13:56	#806263 -> 806212
Por:L´ ASTURIANINA
RE: ¡ Ni con muchu ! ... Canta la moza llevando la jerrada n´a cabeza, canta cuando cose y llava, cuando salla y cuando allenda, cuando jila y escapulla, cuando arrinca y cuando mesa. ¡Y qué cantar...! si al oíla jasta ´l miruellu empapiella! ...Canta ´l mozu cuando cucha, cuando colle y cuando siembra, cuando cabruña ´l guadañu y cuando roza n´a cuesta, y tamién canta y relincha cuando va a ver la so prenda. ...Y cuando coteru arriba van pa ´l monte las oveyas tosquilando de pasada, los gromos y las varetas, sin parar sona ´l lloqueru, que ´l carneru de más medra lleva ´l piscuezu colgau abasnandoi las guedexas; y el rapaz, va atrás cantando ó toca la chifla nueva qu´elli jezo del alisu despegandoi la peleya. Y pa qu´en fín, todo cante onde Dios l´encantu hiciera, jasta ´l carru pa cantar lleva música n´a exa. ...E verdá que no hay las frutas que aquí tienen por tan güenas, como esi zapote prietu que paez mier...., tente parllera, de rapaz recién nacíu antes de prebar la teta; ni el mamey, ni la guayaba, ni el mangu que sabe a brea, ni el chicu y la chirimoya, ni el plátanu con sos jueyas, ni el espitosu chayote qu´e de las frutas afrenta. Pero ¿qué val todo esto al par de nuestras cerezas más roxas que los corales, más dulces qu´azúcar mesma, de los piescos, las pabías, los prunos y las ciruelas, los jigos y las castañas, las ablanas y las peras? Y donde estén las manzanas ribadavias ó camuesas, tiernas dulces, del obispo, balsahinas ó ranetas, las otras frutas no son más que potage de trencas. ...Y donde jirve la sidre que quita todas las penas, toos los vinos y licores aflóxanse de vegüenza, igual da que sea champaña, que sea xerez, que cerveza, y nada digo del pulque por no jacei un´ofensa. Y que lo dichu é verdá, atestigualo pudiera, -¡pos son pocos en la Villa los sidreros, en concencia!- que to de sobra hombres güenos que lo mesmu que yo piensan; pero é mejor que cad´unu jaga en sí mesmu la preba, y desd´agora i prometo que si á paladiala llega, que muertu, ¡Josús!, m´entierren, si á soltar güelve la peya. Autor ......ÁNGEL DE LA MORÍA Libro ...... CIEN AÑOS DESPUÉS
Puntos:0

Simulador Plusvalia Municipal - Impuesto de Circulacion (IVTM) - Calculo Valor Venal

Foro-Ciudad.com - Ultima actualizacion:07/08/2020

Clausulas de responsabilidad y condiciones de uso de Foro-Ciudad.com