Boquerizu - Asturias

Yá se fué´l domingo´l Gordu,
martes d´Antroxu esfumóse;
ya´ntierraron la Sardina,
la Cuaresma´ntró al galope,
y tendremos qu´ayunar...,
la sangre non s´alborote.
¿Cómo pasásteis les fiestes?
¿Chasteis na forna boroñes?
¿Comisteis munchos frixuelos?
¿Fixisteis les picatostes
con guevu,miel y mantega?...
¡Mialma que tarien bones!
Vos rellambereis de gustu
con les fuentades atroces
d´arroz con lleche y natilles,
qu´al colase pe´l gañote,
pa que no s´empapizara
el campanin,¡redemontres!...
con copines d´anis dulce
el gaznate remoyóse.
Si llenastes bien l´andorga,
y non tuviésteis dolores
de ventrisca, o calentures...,
nin apuru de calzones,
nin agua de Carabaña
pa llimpiar les digestiones,
bienaya cuanto comiésteis:
llenos de satisfaiciones.
Abondos años com´isti
pid´a Diós vos proporcione,
y que veais a los fios
con salú, pan y doblones.
Aparte d´eso, dexaime
que vos fale d´otres coses:
tuviemos una semana
sin respirar los polmones,
con frios,ñeve y xelades
na ciodá, n´os praos, ne´l monte;
blancu´l teyau de les cases
blancu´l suelu con alfombres
de ñeve hasta les rodies,
blanques y blanques les copes
de les palmeres del parque,
de les ilesies, les torres;
blancu´l arenal, la playa,
del alumbrau, les faroles;
blancu´l muelle y los xardines,
les lanches y los vapores...
Con tantos trapinos blancos
como baxaben dia y noche,
apetiguñaos n´el aire,
texien mantes llechoses
qu´al facer el arcu iris
so lluz nos gueyos rompióse.
Y el copleru,per cansau,
dexa de descurrir coples,
Adiós ...Conservaibos bien;
de mió familia expresiones...
y pa San José, el tu Santu,
nuestres felicitaciones.