Boquerizu - Asturias

Taba Dios un día de güenes
y mandó baxar al fíu
a isti mundu empubrecíu,
pa axustanos unes leyes
y vivir con más sentíu.

Metiéndose na mollera
que ñaciera pobritín,
dexolu nun portalín,
muertu frío y sin foguera;
nin siquiera un abriguín.

Con la fame y con el fríu
d´aquelles fuertes xelaes,
daba pena ver al críu
entre la paya metíu
y les manines cruzaes.

Mientras Xosé daba hachazos
a un troncu que taba fuera,
la Virxen, con unos trapos
enrollolu ente sos brazos
faciendo una enredadera
como si fuera un corsé.
Y dexolu tan tapau...
que si non ye por Xosé
qu´allega a tiempu...¡Non sé!
el neñu queda afogau.

Distapoi los dos güeyinos
les ñaricines tamién.
Rumieando dos cantarinos
col deu fixoi ricinos
y durmió requetebién.

Allegaron los vecinos;
güajes, homes y muyeres,
con pites y cabritinos,
fabes, boroña, quesinos,
piescos, manzanes y peres.

Vino dispués el gaiteru
pa cantai una asturianina
y dixoi una vieyina
que nun sea maxaderu
que´l neñu ta´n la cunina.

Como el gaiteru ye sordu
nun entendió lo que i dixo.
Pegoi a la gaita tal sorbu
que´l troníu foi tan gordu...
que nun sé como lo fixo.

San Xosé que taba atentu
pa´l neñu nun dispertar,
mandólos pronto a callar
y que pisaran con tientu
si algún lu quier visitar.

Adientraron dispacín
con el alientu frenau.
T´os i dieron un besín
en el deu d´un piesín
que i dexaron distapau.

Al acabar los besinos
el neñu se dispertó.
Bailaron los anxelinos
con les vieyes y vieyinos
y el gaiteru resopló...

Ista canción asturiana:
Anque´l mundu nun lo crea
isti neñu ye de Sama,
de la Pola de Llaviana
y de Cangas de Narcea.

Ye de la cuenca minera,
de Mieres, Pravia y Peón
y tamién de la Felguera;
peru pa la mío mollera...
vino a ñacer a Xixón!