Boquerizu - Asturias

Currucada en portal n´el santu suelu,
Co´les manes á Dios en el regazu,
Los güeyos ´tristayaos y mirando
Ententes pa ´l aleru del sobrau;
Sueltándosei dalguna que otra llágrima,
Gorda como les perles del rosariu,
Está una probe medre, que da pena,
Os d´una Dolorosa ye el retratu:

Dengunu al vella ansina non dixera
Que noi´charen los polvos d´una encantu.
Ya dis que, en allegando la tardina,
Los llabores que fay dexa pa un llau.
Y escalzando los pies, pa non fer ruidu,
Y con tentu y cuidiáo ´echando el paso,
Vien de puntes, igual que si ún dormiera
Y tarreciés la probe despertallu.

Ye pa non escuerrer una andarina
Que, ente el múriu y ´la aleru, alli apiegau
Tien el ñeru, y paéz que á la so cría
Relata el óra, óra con so cánticu,
Aposada ´n ´a güelta d´un gabitu,
Que metanes xunto élli ´stá ´spetáu.

Non sabe lo que ye, si son hechizos,
Lo que i fay dir pa allí casi que al rastru,
Y en sin apistañar y en sin allendu,
Oyer d´aquella páxara el verbariu.

¡Qué coses se i acuerden á la probe
D´un tiempu que se fói como un relámparu!
Qué llagues non se i abren dolories
Col ñeru que ´stá enriba y con el páxaru!
Oyéi lo que i relata á la andarina,
Igual que si falás con un cristianu:

<<¡Páxarina! tú que vienes
Cuando en campu la flor sal,
Y en llegando la Seronda
Ella vien y tu te vas.

>>Tú non sabes ¡paxarina!
Cuanta ye mió señarda
Al oyite tan alegre,
Xunta ´l ñeru tó cantar.

>>Tú la culpa non la tienes
De la pena que me dá,
Porque mal non me fexisti
Nin te fexi yo á ti mal.

>>Al revés, en esta casa
Y es como un de los demás,
Y non hay quien no te quiera
Y no i guste ver to ñal.

>>¡Paxarina! tamién tuvi
Yo fiínos que criar;
Diyos sangre de miós venes,
¡Quién pudiera dayos más!

>>Tamién yo canté al par d´ellos
Como tú cantando ´stás,
Y salía calladino
Désque, añando, dormín ya.

>>Al tú diste ¡paxarina!
Van los fíos ú tú vás,
Y, á non ser aquesti ñeru,
Per aquí non dexes náa.

>>Los miós fíos ¡¡jueron solos!!
¿Quién á vellos golverá?
Tu has vinir cuando les flores
Y los miúyos ¿non viendrán?

>>Como queda solu el cielu
N´á Seronda, que vos vais,
Y enmudéz des que ya i falta
Vuestru alegre esgargayar.

>>Quedó ansina la mió casa
Desque fueron pa acullá
Los miós fíos, ¡andarines
Que non sé si golverán!

>>Si non güelven ¿pa qué sirven
Esta casa, isti fogar?
En to ñeru habrá allegría
En el miuyu pena habrá.

>>Tú, que dás la güelta al mundu
Más ina que ´l sol la da,
Anda ver si los atopes
Cuerri aquí, cuerri acullá.

>>Ellos han de conocete
Ansí que oyan to piar,
Y tú á ellos, que los visti
Munches veces nel portal.

>>Vaxa, vaxa ¡paxarina!
En miós güeyos á chupar
De les llágrimes que vierten
Una güena vocaráa.

>>Has de dáyosla á miós fíos,
Si los llegues á topar,
Y cuntayos les que lloro
En mió triste soledá.

>>Anda, cuerri ¡paxarina!
Que, si quiés, güelves y vas
En un verbu, ¿quién supiera,
Como sabes, esnalar!

>>Cuerri, cuerri ¡paxarina!
Ven cuntame como ´stán;
Si, suañando yo con ellos,
Piensen ellos en so má.

>>Ven á tréme ´n el to picu,
Nel que miós llágrimes ván,
Carta d´ellos, que sea el pañu
Pa miós güeyos ensugar.

>>Anda, cuerri; aquí t´aspero
Nisti sitiu acurrucáa;
Si, al golver, sin nada güelves
Muérome de señardá.>>


Igual que si entendiés lo que i falaba
La páxara ´scolgose d´aquel palu;
Dió güeltes pe ´l portal de despedía,
Como si fués facer aquel mandau,
Y, ´echando un esnalón, sal com´un cuete
Chillando muy lixera per el campu.



JUAN Mª ACEBAL Y GUTIÉRREZ