Boquerizu - Asturias

Diba´l sol ya bien p´abaxu
sinqu´entavía´tapeciera;
ya dexaben los paisanos
les llabores de la tierra,
axuntándose na eria
pa falar de la coliecha
y de pasu matá´l tiempu
fasta´l hora de la cena.

Sona´l toque de la tardi
na campana de la llesia,
qu´el molacín ya pesllaba
terminada la ñuvena...
y espatuxen pa llegase
endenantes qu´escurezca
al capaz, pitos y pites
que son xentes de concéncia.
Esñalaben los ñerbatos
pa guardase n´arboleda...
y non queden po los eros
más que <<páxaros de cuenta>>.

Xustamente candu Tista
dispertaba de la siesta,
espurriendo bien los brazos
per derriba´la cabeza,
avociando´nte berrides
y esmayau po la zapera.

Llevantosi muy dispaciu,
qu´aforfugase no i preba,
abaxó pa la cocina
y dixoi a la costiella;
- ¿Qué vas dame pa la nochi?
¿ya punxixti la menestra?
¿Comu tan aqui´ntavía,
los rapazos y la güela?...

Mira...voy catar un pocu
pa que me desentomeza,
mentantu l´arroz ablandia
y dispaches la reciella...

............................................................

Aplasmóse toda <<Xina>>
de qu´el home tal dixera
y quedóse arremellada
como quien topa la güestia,
lo que non yera pa menos,
pos des que casó con ella
e´na vida fizo nada
nin pa casa nin pa juera...

............................................................

¡Qué diba´catar, mos dixo...
vamos que ye cosa seria!
¿Qué mosca lu picaría
pa qu´asín de prontu i veña
la afición por el trabayu,
y pa más ista queriencia...
si por non dir a la cuadra
non sab´onde ta la puerta?...

............................................................

Tal pensaba <<La Ximara>>,
n´alta voz, sin dase cuenta,
cand´oyéndola ´l rapazu
que tinía más a la vera,
espantói lluegu les dudes
aprontando´sta rempuesta:
- Entós, má, ¿tú qué cuntaste?
¡me paéz que non tas güena!
¡Cudiarás que va´l establu
pa trayenos llechi fresca!...
¡Non foi el catá´les vaques,
foi catá´la sidre nueva!



ANTONIO GARCÍA OLIVEROS <<AGO>>

Navia 1900