Boquerizu - Asturias

Señor Conde Campumanes,
cuyu ñombre tantu estruendu
fai en todes les ñaciones
de unu y utru hemisferiu;
quelles que moren al cabu
del mundo, el sabiu europeu
vos apelliden, y otres
el Salomón d´isti tiempu,
della cámara fiscal
con votu y con tratamientu
d´obispu para ordenar
al eclesiásticu y legu
aseñalando los finsos
al sacerdociu y imperiu...

Yo, ya se vé, so asturianu
y asturianu fasta el güesu,
que me fuelgo cuando oyo
cualquier ñovedá ó sucesu
que cuenten d´un paisanu
que llogró dalgún aumentu.

Mas ñueves de Madrí á Asturies
vienen muy á pasu llentu,
son como peres señores
que se cueyen pel Avientu;
el camín ye abondo llargu
y á partes ñon pocu estrechu;
hay munchu ríu sin ponte,
hay puertu dempués de puertu,
hay collades emprunaes,
munchu escobiu y vericuetu,
y si hay pedreres son tales
que, sin encarecimientu,
pa les besties de Castía
cada pasu ye un tropiezu.

Ansí yo quedo ablucadu
quando veo tantu xumentu
castellanu per acá
que paños pasen d´un cientu;
porque ellos lleven les fabes,
el tocín, la fruta, el quesu,
la cecina, y otres coses,
bien que dexen el dineru;
pos si falo de pescao
eso ñon tien paraderu
porqu´ellos carguen d´atún,
de merluza, congriu y meru,
salmón, roballu y besugu
de xemés en cuando frescu
y, á veces, escabechau
con sos fueyes de lloredu:
verdá ye que les xornades
que fan son de tantu trechu
que dudo, d´Uxo á la Robla
si tarden seis dis y mediu,
¡ola!, y eso que el borricu
anque ñon paez lixeru
si arreciende al so país
anda com´un argandiellu,
mas si quier argadellar
per trabancu, per folleru
ó per tayos, dá ce bruces
y dexa á so amu el mosteyu.

Según esto, qué milagru
que perezosu el correu
ñon allegue tan aína
y muncho más al mió pueblu
qu´anque ñon está muy lloñe,
como hay tantu enguedeyu
cuando se escueyen les cartes,
que van á cada conceyu
pos toos quieren les suyes
y cadún ser el primeru
que despache, adolecíu
se pon el estafeteru
y chando fiebre y coriscos,
tronando com´un ñuberu,
pieslla puertes y ventanes
y si llamen, fechu un perru
sal con un tochu d´ablanu
de bon carbayu ó de acebu
semando palos per toos
como granizu en xineru.

Con esto cadún escarma
á costa del so pelleyu
y averadu hacia un rincón
ñon gorguta man q´un muertu:
ansí el administrador
aposentadu el aruelu
empieza a apurrir valixes,
la de Xixón, la de Sieru,
la de Avilés, la de Llastres,
la de Cangues, la de Infiestu
y, en fín, les del Principao
desd´unu al otru conceyu.

Ve aquí porque un probe home,
que mora allá hacia léxtremu
d´á ú está la capital,
anque sea home de sesu
y sepa daqué escribir
y ller bien per un procesu
ñon sabe ó sabe muy tarde
ñoticia de fundamentu.

Y unda agora, Señor Conde,
fó un raru acontecimientu
supiés yo que de Castía
estábeis títulu fechu.
Porque, falando verdá,
yo tenía un xatu prietu,
que diba ya á los tres años
y ñunca pudi fer duendu;
conque viendo q´al trabayu
se arresistía el magüetu,
traté llevalu al mercadu
por si podía vendellu,
dos xamuezques á les astes
i fixi con un bon reyu
y dempués bien amarradu,
mandé afalámelu á un neñu.

Allegamos á la Pola
y apenes tomamos fuelgu
quando vien un valencianu
y me entruga por qué preciu
daba aquel animalucu...
Yo entós faciéndome el seriu,
i dixi: - <<Habrálos mayores
ñon lo dudo, allá en so suelu,
pero otru más bien trazadu,
bien encornadu y refechu
puede ser que ñon lu habia;
un doblón de a ocho ñuevu
m´a dar por isti armentíu,
q´ellu ye fechu y derechu.>>

- <<Vaya que ñon será tantu.>>
dixo, y s´arrimó al nuviellu,
entamando d´adentallu;
mas el güe que ye traviesu
y algo duru de testuz
lu aventó com´un panderu
y dando contra un revollu
cayó metá d´un llamuergu....



ANÓNIMO