Boquerizu - Asturias

Dedicáu a tolos gaiteros y a l'asturianina, (préstenme enforma les sos asomos lliterarios per esti requexu oriental).
---------------------
Una vez yera Xuan el gaiteru y María l'espadadora. Pe la nochi, na cocina, diz María a Xuan:
-Oyi, Xuan. ¿Qué demoi tenrá Xuacu Meleru, el sacristán, que per u quiera m'atopa fálame lo mesmo:
<Maruxina, ñiclis; Maruxina, ñiclis>. ¡Bah, bah, co'l home!...
-Pos güeno -dixoi Xuan- si utra vez dizte dalgo, falai tu ansina:
Y dixoi lo qu'había de falar.
Al utru di mesmamente topa'l sacristán á Maruxina, camín de la fonte.
-Maruxina, ñiclis -diz al vela Xuacu Meleru.
Ella fízose que nun lu oyía.
-Maruxina, ñiclis -golvi elli.
-Xuacu Meleru, ñacles -diz 'ntós María.
-¿A qué gora?
-Al dir el mío Xuan a tocar n'a fiesta.
N´efeutu, al utru di sona la gaita de Xuan, caleya abaxo, como que diba pa la fiesta,
y d´un saltu plantóse Xuacu Meleru en ca María. Ya escomenzaba á facei pintures y relicorios cuando n´esto sona la gaita´l par de casa.
-¡Ay! que golvi´l mió Xuan -fala María.
-¿El to Xuan? Escuéndeme, Maruxina; escuéndeme -diz tou ñerosu Xuacu Meleru.
-Métete n´arca.
Y metióse al mesmu tiempu qu´entró Xuan y fala:
-María, apúrreme la utra montera nueva.
-Pero Xuan da mio alma, qué más ti dá isa que utra.
-Traila acá, María, y non me tentes.
-Pos mira páñala tú n'el arca.
Foi Xuan pa´l arca y ¡Anxela María! topó a Xuacu Meleru dientro. Sin más ni más gárralu pel pescuezu y ascomienza á dar mormiellaes per él, y el probe sacristán lloraba como si lu mataren.
Y no paró ansí la cosa, si non que llevolu pa´l corral y poniéndolu desnudu como su má lu parió, amarróli al finxu del piseble, dexándou allí al par d´un xatu mamón que lu miraba con unos güeyos...
Non permediaron munchos dis y atópense Xuacu Meleru y Maruxina, camín de la fonte,
y como Xuacu no i dicía na; falai María con malicia:
-Xuacu Meleru, ñiclis.
Y el sacristán non gorguta.
-Xuacu Meleru, ñiclis -golvi ella.
Entós Xuacu diz muy salibau y tou corríu:
-Maruxina, nin ñiclis, nin ñacles; si el to Xuan quier criar xatos, que merque vaques.

PACHÍN DE MELÁS

Gracies per la dedicatoria.
Gústame muchu que ti guste lo que fago. Así ya somos dos a disfrutar con lo mismu


Muy, muy güenu el "ñiclis, ñacles"