Boquerizu - Asturias

Calce zapatos,xinte con manteles
Cómia en vez de boroña pan de escanda,
Asiéntese en escaños, no en tayueles.
El señorón que na ciudá nos manda,
Y en sos tierres, so casa y sos llebreles
Fuélguese en paz y d´una a l´otra banda,
Mande conceyos, faga munchu ruidu,
Si para tantu arrullu fó escoidu.

Y non dórmia, y rodiadu de señores
Ande de romería en romería
Perdidu entre comides y entre amores;
Y cuando el Rey lu llame y tiempu sía
D´obedecer el son de los tambores,
Vaya armadu á la guerra, y llarga vía
Tope en ella á la fama y la riqueza
Y vólvia llevantada la cabeza.

Que yo entre los miós fíos sosegadu
Si la lleche y boroña non me falta,
Y tengo al llar el pucherín tresnadu,
Y la manada pe los campos salta
Alegre y farta, y paz el mió ganadu
Les yerbes de San Xuan, ciertu más alta
Fortuna non pretendo, nin quixera
Q´otra suerte meyor la mía fuera.

¿Y pa qué desear seda llabrada,
Escudielles de plata, muncha xente
Que me faga al pasar la bonetada,
Y mandar el llugar y ser Rexente
Y Capitán á guerra, y la rodiada
De mió solo falar tener pendiente,
Si he que lo to llograr siempre asustadu
Con ayenos cuidados afogadu?

So probe, ye verdá; pero non tengo
Quien estorvisa ponga á mió dormida,
Nin cuando al eru salgo ó d´illi vengo,
Me sopelexa naide: nin la vida
Trayo en continos sustos, nin prevengo
Con alma ruin y la intención torcida,
Peligros, trampes, la malicia ayena
Que dá, en vez de contentu, susto y pena.

Mande Xuan, mande Pedru ¿qué cuidado?
Quiéranme la muyer y los miós fíos,
Col mió sudor alcancen un bocadu;
Que pódia yo cuidar los armentíos,
Agarrar la fesoria y el aradu
Sin temer los calores nin los fríos,
Y bon provechu faga á los señores
La ciudá, la riqueza y los honores.

Cuando de la llabor con sustu y pena,
Fartu de trabayar, pero contentu,
Vólvio pa casa á esmorullar la cena,
Anque con bones ganes, non famientu,
Nin la conducta propia nin la ayena
Vienen entós á dame sentimientu:
Siéntome xunto al fuebu, y la reciella
Axúntase al olor de la escudiella.

Llevántase en el llar la fogarada,
Que fai la lleña seca de carbayu;
Afumen les fariñes; currucada
Tuxa con cuyarón cabo el mió tayu,
Reparte á cada cual la so platada,
Con la suya convídame al soslayu,
Doi á los ñeños, cómo lo que quiero,
Y a Dios que me lo dió, rezo primero.

Ya fartuca la xente y placentera
Con ¡ixuxús! atruena la cocina:
Tuxa se pon alegre y gayaspera;
Reblinca el pequeñín: canta Xuanina
<<El galán d´esta villa>> á so manera,
Y yo enriestro panoyes entretantu,
Atentu á los trebeyos y al so cantu.

Mas cuando ya va llarga la velada
Y el pigazu me diz que non ye aína,
Pe la mano de Tuxa solliviada,
Esmúzome na cama fresquilina.
D´allí, baxu la manta colorada,
Oyo ruxir el vientu na colina,
Dar bramidos el mar alborotadu
Y la lluvia correr pel mió teyadu.

¡Qué gustu atapadín y sin cuidados,
Pensar entós en probes caminantes
Pe los montes perdidos y moyados;
O acordáse d´aquellos ñavegantes
Q´entre vientos y peñes azotados
Sin saber donde van, ciegos, errantes,
Cuerren les tempestades pe los mares,
Mientres seguru estoy é nos miós llares!

Estes coses pensando de pasada,
Quiciás cansadu de cabar tapinos,
Al sueñu más sabrosu dan entrada;
Duermo, y cuando amanez, los paxarinos
Puestos é na figar de la corrada
Empezando á facer gorgolitinis,
Dispiértenme contentu y gayasperu
Con ganes de llabrar y dir al eru.



CONTINUARÁ.......

¡Qué gustu, qué gociar puede igualase
Al que me ofrez entós la mió quintana!
Allá, muy lloñe, empieza á llevantase
Tras los montes el sol, tiñendo en grana
Les flores y los prados: agrándase
Pocu á pocu se ve, y ena fontana
Seliquín se retrata, y los sembrados,
En so apacible lluz dexar bañados.

Les flores del rocíu salpicades
En blanco y roxo y en azul teñides
Y de sos rayos dóro matizades,
Parez que están de pelres revestides;
Imaxen de llivianes mocedades,
Y como elles sabroses y cumplides,
Encantu y gustu son del que les mira,
Y so meladu olor quiciás respira.

Gústolu yo tranquilu y sosegadu,
En tantu que baxando á la fontana,
Bebe sos agües pures el ganadu,
Antes que les caliente la mañana,
Corre dempués á fartucase al pradu;
Véolu yo pacer de bona gana,
y les oveyes reblincar llozanes,
Y anímase col día les quintanes.

Que ya atruenen el monte y carbayeres
El chirridu del carru, y los cantares
De los mozos que van á sos q´haceres:
Ya tempranín dexando lo llugares
Cuerren á derramase pe les eres;
Ya afumen á lolloñe los fogares;
Ya asoma el rapacín con so manada,
Col xiblatu tocando una sonada.

Muy reliquín respondei la montaña
Con suaviquina voz mediu apagada;
Y e na fuente que cuerre pe la braña
Donde llaven les moces la colada
Ruxe la gresca, empieza la maraña,
La xente está contenta y ocupada,
Y todo é movimientu y alegría,
Desde que ñaz fasta que muerre el día.

Un fresquillín que cuerre na campaña,
En perfumes de trebol empapadu
Y madreselves mió semblante baña,
Y pa el trabayu déxame folgadu.
Piesco entós la fesoria ó la guadaña;
Arriendo, sallo, siego, ó col aradu
Detrás de los miós gües llabro les eres,
O compongo les sebies y boleres.

Y non la tierra al mió sudor se ñega;
Acá roduz panoyes, allá espigues;
Cueyo fabes aquí;dáme una siega
De yerba en otra parte sin ortigues,
Y á la bona cebera siempre allega
Castañes y panizu pa les migues,
Y prunos, y cereces y manzanes,
Ñueces y figos, ñisos y avellanes.

El que non vió quiciás llegar á casa
El carru co los frutos de la tierra,
Y cómo el tiempu en recoxelos pasa,
Y cuántu fuelgu y esperanza encierra,
Y el gustu que produz puru y sin tasa,
Enhorabuena fale de la guerra,
Y envidie los palacios, los honores
Y el arrullu que gasten los señores:

Más quiero yo asistir á una coída
Y llenar por mió mano dos macones,
Más quiero ver la xente entretenida
Axuntar les espigues en montones,
Pe les eres aquí y allí esparcida,
Y escuchar el so cantu y sos razones,
Q´asistir á les fiestes palacianes
Por alegres que sean y galanes.

Y más mil veces y otres mil m´agrada
Dempués de todu el frutu recoxidu
Con ella reblincar so la enramada,
Echar un ¡ixuxú! com´un tronidu
Que dexe la quintana solliviada,
Y el que atopás un horru dai cumplidu
El bollu y el torrendu de costumbre,
Que veme del poder é n´alta cumbre.

Nunca me ñegue Dios en isti día,
Apurrir á los mozos y á los vieyos
Los figos y la lleche y la rosquía,
Folgándome con Tuxa en sos trebeyos.
Nin falten corredores q´aporfía
Al llegar sudorientos á los teyos,
Ganen e na carrera la cuayada.
Al que más diestru sia destinada.

Como llozanos potros desbocados
Q´el vientu corren sin tocar l´arena,
Unos tras d´otros van precipitados;
El pechu francu, suelta la melena;
Los brazos fasta el codu remangados,
Del triunfu y la esperanza l´alma llena,
Sin zapatos, sin calces, sin ropía,
Más llixeros que cuete en romería.

Nibe de polvu entónces se llevanta,
Y n´ella envueltu el mozu que ya espera
Con fartu empeñu y con lliviana planta
El términu tocar de so carrera.
Cede y s´arrastra al otru que se llanta
Métanos xunto á él y lu supera,
En piernes y en alientos, y la grita
Y les palmades del que mire excita.

Y allega más forzudu y más arteru,
Sudorientu, lliviano, espolvoriadu,
A tocar é nos teyos el primeru,
Y allí mismo por todos declaradu
Ye el Rey de la coída, y gayasperu
Recibe de les manes dúna ñeña
Del vencimientu la esperada enseña.

La noche de los montes descolgada
Y á los valles más fondos extendida,
Bexa ansina la gresca terminada.
Vase la xente
, farta y divertida
Con ¡ixuxús! atruena la encañada,
Y allá muy lloñe ruxe repetida
La grita de los mozos entre peñes
Que van llevar á casa les sos ñeñes.

¡Gustosu disfrutar! ¡Que Dios non quiera
Acabes ñunca para min: primero
Falten flores al pradu en primavera,
Por San Xuan haya xelos, y en xinero
Derritian los calores la mollera;
Por yo nin más fortuna y diches quiero,
Qén paz vivir conmigo y los vecinos,
Y criar para Dios los miós ñeñinos.



JOSÉ CAVEDA Y NAVA