Boquerizu - Asturias

-Refael, aspera´n pocu,
porque tengo que falate
y tarrezo que dexemos
pa más llargo la custión;
ansí ye que posa´l cestu,
que te presta pa sentate
y pa oyémi con dispacio
sin denguna´smolición:

Yo y to má vamos pa vieyos,
iso bien pódies notalu;
tú tas cerque de los trinta,
tampocu lo pués negar;
que y´edá pa tar xuncido
ñaide poderá atayalu;
pos e nisti presupuestu
¿por qué non te quiés casar?

Aquí falta xente moza
que trabaye con má xera
nes llabores de la casa
que dan munchu que facer;
y to madre tá, la probe,
co la pata na güesera,
nesecita que la cúdien,
que l´axud´una muyer...

-Güenu, pa, pos non s´enrrite
que n´hebrá daqué pa dellu...
si vusté quier que me case
ta faláu y ...non hay más;
ye verdá que non me pruye
mayormente por facellu,
pero abasta lu que dixo
pa non chame yo patrás.

Y a todest´¿ú tá la vaca
con quién voy facé´la xunta?
porque... pázme pol descurso
qu´usté ya la tien buscá.
-¡Hom´a tantu...voy dicete,
n´algamaba la mió cunta!,
peru ya que me lu´ntrugues
falaré sin cortedá:

Mira, a mín gústame munchu
la fiyasca de Pepina.
-¡Cordia, padre, pero cúdie
qu´el que casa non y´osté;
y endemás de focicona,
parllotera y gurrumbina,
tien un güeyu fechu papes
y del otru apenes ve!...

-¿Y les vaques y los gochos
y la casa qu´ha lleváte
son p´andiar en requilorios
por un güeyu nin por dos?
Güenu...ye miyor dexalu
pos si vas a´nfocicate...
¿Y qué tienes que diceme
de Sabela la d´Amós?
-¡Munchu más tengo´nagora!
¿por non ve que ta´gurriada
po la cara y el piscuezo
que paréz un alcordión?
-¿Y Rosina de Celesto?
-Isa ye muy aparrada,
y non quiero ná col padre
porque ye muy furruñón!...

-Ansi ye ¿que n´hay denguna
que t´enllene pal casóriu?...
Mira, fiu, ¡xuegu claru!;
quien te trái a ti alloriau,
y´esa neña paxarina
de Carmela de Grigorio,
que llegó de los Madriles
col focicu muy pintáu...

Y con utres munches coses
deprendides <<nel serviciu>>,
como ye´l salir de nuichi
illa sola a caleyar...
Y bien sabes que se ruxe
de tres críos nel Espiciu
y de trucos y enguedeyos
que...¿paqué vamos falar?...

-¡Pos todeso son mintires
de mozacos resintíos
porque non yos fizo cara,
como bien lo sabe Dios,
y son isos los qu´esparden
qu´illa tévo ya tres fíos,
y esto, padre, ye un llevantu!...
¡¡que non tévo más que dos!!


ANTONIO GARCIA OLIVEROS <<AGO>>