Boquerizu - Asturias

<<Pasé´l Puertu de Paxares,
paselu con mucha pena.>>

Guapinos cantares
los de la mió tierra,
qu´enllenaisme d´arumes el alma,
que me tais amusgando de llerza;
magar vos escluco,
¡mio madre, entram´una pena,
que me caen les llarimines
y temblo como una fueya!...

<<Pasé´l Puertu de Paxares,
paselu con mucha pena.>>

Los mociquinos d´hogañu,
non tienen pizca fachenda:
nin bailen les tres perrines,
ni van pintala a la fiesta;
nin canten como cantaben
les tonaes de la tierra;
nin se solmenen el cuayu;
ni a torgar hay quien s´atreva;
ni a purrise tarreñazos,
ni a romper una cibiella
so los llombos del contrariu....
-<<Asturies non ye quien yera,
que cuando yo era rapaza>>,
-diz sospirando mió güela.
Agora, los rapazacos
bailen sólo a la organiella,
o al son, són de una orquestuca
déses que van pe la feria.
¡La gaita! ¡La gaita tá permalina
desque´l pueblu la disprecia!
No tá´nsiquiera colgada,
tá tirá tras de la puerta,
tan muda como calandra
que se xela na ñevera...
¡La probe qu´era nes fiestes
la alegría de l´aldea....!

<<Pasé´l Puertu de Paxares,
paselu con mucha pena.>>

Quieren más los rapazacos
pasar la noche de xuerga
del diañu del Camaré,
y bailar ena verbena
apretuxaos y esmollos
como pexe sen conserva...
¡Cuando se viera n´antañu
cosa igual! ¡Dam! vergüenza
en tan siquiera decilo...
¡Porcinzones, qué decencia!
¿Y a eso ñamais coltura
y aducación, so babiecas?
Y tocante a los cantares...
¡mio probe y querida tierra!
¡Miray el que oyí cantar
ayer a una bolboniega!:
<<En mi país no hay luz...>>
¡en xamás l´hebo n´aldea,
y e nel mundo no hay mocina
con mas llumes que la nuestra!
¡Llumes nos güeyos perleros,
que dan envidia a la estrella
mas allumá de los cielos!;
¡llumes ena só fachenda
y e nel talle sandungueru,
que ye de mozos, dentera...!
¡Esta ye la lluz, moscarda,
qu´enorgullez a l´aldea...!

<<Pasé´l Puertu de Paxares,
paselu con mucha pena.>>

Guapinos cantares
los de la mio tierra;
¿quien vos oyó que vos oya,
que señaldades non sienta?
Cantares que yérels
música melguera,
por quien sopirando amores,
el galán, alexau de so tierra,
doliósu moría,
¡moría de pena...!
Y entovía toi pensando,
que razón tuvo mió güela
<<¡Ay, nietiquín de mió vida,
Asturies, no ye quien yera,
que tá enllena de cazurros
y arabesos... ¡Santina, quién lo dixera!
(Si aquel bon Rey Don Pelayo
llevantara la cabeza...)

Pasé´l Puerto de Paxares,
paselu con muncha pena,
porque mío Asturies del alma
despidiome con tristeza....



EMILIO PALACIOS

MUY GUAPO ASTURIANINA,VEO QUE YA VUELVES A VISITARNOS.