Mondoñedo - Lugo

Comezou a restauración das vidreiras da catedral de Mondoñedo. A propietaria da empresa MiVidrio de León, María Vázquez, con ampla experiencia na restauración de vitrais en monumentos destacados, encóntrase estes días na localidade lucense con outra experta para executar os traballos que, segundo explicou, se prolongarán polo menos uns tres meses. A Xunta sufraga o custo da restauración, que sobe de 30.000 euros.

Á parte das vidreiras actuarán sobre o magnífico rosetón, onde apreciaron problemas no círculo central, de chumbo. A idea é limpalo enteiro e endereitalo nas partes que o necesite, para o cal no prazo dun mes, aproximadamente, o baixarán para actuar sobre a peza.

Nas vidreiras observaron un grao de deterioración importante nas partes inferiores, co que os labores non soamente se limitarán a unha limpeza, senón que tamén incluirán a reparación de gretas e fisuras, a colocación de suplementos de vidro nas partes que faltan, a reparación ou substitución dos bastidores de ferro que estean danados, onde van apoiadas, e os cerrados.

Tanto os vitrais coma o rosetón da seo mindoniense foron confeccionados a mediados do século pasado pola firma Maumejean, unha empresa fundada en Francia en 1860 por Pierre Maumejean que durante século e medio se dedicou a esta actividade. Algún dos seus descendentes trasladouse a España implantando aquí un dos talleres vidreiros máis prestixiosos do Século XIX, dos cales saíron vitrais para as catedrais de Sevilla, Burgos, Vitoria ou o Teatro Raíña Victoria, entre outros templos e edificios destacados.