Ferias de Santiagu Buenus dias a todus. Encabezu el escritu de esta manera por que estu era el origin de todu. Era la feria más importanti del añu, dondi se vendian, cambiaban ó truncaban todus los animalis domésticus. Aun recuerdu comu se jacian los tratus en realis, ya llovió. Me costaba muchu entenderlu, la peseta tenia cuatru realis, asi que cuandu mandaban 20.000 realis por un animal era toda una fortuna para mi, la cantidad en esi tiempu de 5.000 pesetas era algu respetabli. El Barreru se cerraba, cada unu jacia su tablau para ve los torus, se ponian carrus de vacas y con tablonis y palus de castañu se jacian los palcus pa ve el espectáculu. Se traian resis bravas del campu de Villamie, algunu demostraba su valentia ordeñandu una vaca brava, luego se sacaban los novillus pa torealus que ya venian encajonaus, en el publu esus dias habia forasterus de todus los lugaris de alrrededo, caballistas del pueblu y de otrus lugaris, que demostraban su destreza. Tantus recuerdus me vienin que no terminaria de escribi, la pista de veranu pa baila de tiu Pedru en el parao, que nostalgia. El amigu Pacu, que dici está jubilau, recordara todu estu también. El otru dia por casualia vi su página, me gusto, peru me llamo la atención un comentariu sobri nuestra jabla,decia, venian caballistas de otrus lugaris, coma se decia antaño. Esta es la pena Pacu, que hemus perdiu nuestra jabla, nuestra seña de identiá, deciamus con orgullu, el que no dici, jisu, jigu y jiguera, no es de mi tierra. Me gustaria que los amigus de Villamie, que tienin su página, le preguntarian a sus ancestrus por la jabla de antis, ellus, los jóvinis tienin el debé de encontrá nuestras raicis culturalis y nossotrus de enseñali lo que sabemus al respectu, es una ilusión no tan dificil. Melancolicamenti me despidu, sera cossa de la edá. Felicis Fiestas a todus.
|