San Martín de Trevejo - Cáceres

Magnifica panorámica, mye. He abertu as ventás de minha cassa i, aún tendu o mar en frenti, nun se poi comparal con a ventán que nos has postu en o foru. Mil gracias.
Forti abrazu.

Pensaba ponhel esti escritu comu "nova conversación", peru a vel esta fantástica fotu de mye cono pantanu o fondu, he cambiau de parecel.

Cuandu vaia o Lugal, pensu vixital a obra d’ingeniería hidráulica que s’está fendu, i qu’apareci enesta guapa fotu de mye. Porque nun quixera cometel duas vedis o mismu errol.

As coixas chegan cuandu tenin que chegal i nun antis. Cuandu en certa ocaxión tuvi que fel un-hos trabalhus enas instalaciós da prexa. Ni tan siquera me mulistí en vixital o ponti. Porque entri otras coixas: m’importaba un caralhu. Alguin idía: enos anus da forza i xuventú, o homi s’emborracha conos placeris, viáixis, trabalhus i mutas coixas mais. Hasta que chega un día i se da conta, de que mutas d’aquelas coixas ia nun le satisfadi i busca otru sintíu a existencia.

Ha síu necesariu que pasaran os anus, pa vel que tuvi o lau un-ha obra maestra d’arquitectura/ingeniería que ni tan siquera mirí.

A finais da década dos sesenta, se finalizan as obras do pantanu d’Alcántara, dandu pasu a o embalsamentu. Duranti un tempu, o ríu Taju queó secu un-hos kilómetrus aguas abaisu da prexa. Pues ben, pusiblimenti, por primeira ve ena sua historia, quea a descubertu a baxi d’un-ha obra d’ingeniería civil das mais importantis da Hispania de Trajanu; feita poro arquitectu Cayo Julio Lacer. Comu ia habreis intuíu, m’estoi refirindu o ponti romanu d’Alcántara.

-Mutus de noxotrus pensaremus: ¿qué ten istu de singular? –A verdai: ¡sí que ten! ¡i mutu!. Pues, duranti os días qu’os cimentus dos pilaris queorin o descubertu, mutus técnicus en arquitectura, ingeniería, arqueología, prensa... Se desplazorin hasta alí, pa vel, o que duranti siglus nun s’había vistu i que pusiblimenti pasi mutu tempu mais sin que se volva a vel.

Estis técnicus, se quitorin o sombreiru cuandu contemplan o perfectu estau da baxi d’estis pilaris dispois de caixi dos mil anus d’estal sumitíus a eroxión dun gran caudal d’agua comu é o do Taju; c’onún régimin maiolmenti laminar, peru seguru qu’en mutas ocaxiós habrá síu turbulentu.

¿Qué tipu de material s’empleó, que ni o tempu ni a eroxión os afecta? . Esperu qu’os materiais que s’están empleandu ena construcción do pantanu que s’está fendu eno Lugal, sean da misma caliai qu’empleó Cayu Juliu ena construcción do ponti. –Bueno, ¡poro menus que se le parezcan!. Pues, si nun son dos mil anus, que duri al menus hasta qu’acabi a crisis.

Forti abrazu.

PD. ¿Sabi alguin que emprexa o está fendu i quin é o técnicu?.