San Martín de Trevejo - Caceres

O CHOCOLATI

Se encontraba esti foru tranquilitu;
en as vainas s´encontraban as espás,
dispois d´as opiniós tan encontrás,
porque a O Soitu l’habían quitau un cachitu.

Varias vedis desde aquí habemus ditu
que se quiti o “pirulí” d´un-ha vé ya.
Cuandu as aguas ya baxiaban ben calmás,
apareci o chocolati de “Nachitu”.

A o falal d`o chocolati, os manhegus
nos tiramus a por él cumu leós;
dos ancestrus d´o lugal ei nun renegu.

Ten poeris, ten moeas, está bó,
con xaringas, o con migas te pos cegu:
Sólu digu qu`está ricu de collós.

03/octubre/07
BRODAS

BOAS NOITIS

Referenti a o tema do "PIRULI", fai un tempu dixi a minha opinión sobre o tema. Si ben creu que hai (habría) que felo a tôs os manhegus que morreran en as guerras de España, nun sólu referenti a inicua guerra d`o 36.

O expuxi en un pequenu romanci que se colgó en o foru en sei día.

Idía (mais o menus) asina:


Máis ei ben creu que hai que fel
un vistosu munumentu
que nos recordi a os demáis
esis ignotus mañegus

que en mutas inicuas guerras
dexorin vía y sentimentus.
p’a que poamus recordalos
y guardali gran respetu.

En as guerras “de las Galias”
o en a d’o Peloponesu
en a toma de Graná
y hasta en Flandis, en os Tercius

Nun importa en qué lugal
dexorin a vía y o “tempu”.
Si se le rindi homenaji
que sea con mutu respetu.

Esti humildi trovaol
se daría por satisfeitu
qu’as novas autoriáis
y o próximu axuntamentu

quitara ya de un-ha ve
esi munulitu feu
que se encontra tras a igresia
en o absidi do templu.

Nunca foi boa coiça a guerra
pa dirimir os dereitus.
Mais aquelis que morreran
merecin mutu respetu