San Martín de Trevejo - Cáceres

-O tinha preparau p’habelo enviau o foru fai tempu, peru se traspapeló i nun había vortu acordalmi d’él.-Esta cabeza minha, fai agua por tos laus. Un,ia vai queandu pa supitas i bo vinhu...

Esti documentu,é un-ha fotocopia d’original que en sei día l’encarguí o mei dagal. Me diisu: que cuadu tuvu enas mas o pergaminu, l’entró un escalufríu a tocal un original do siglu XVII (mil seisdentus). Comu é natural: os funcionarius do "Archivu Históricu Nacional", tomorin to tipu de precauciós; peru com muta amabiliai, le deisorin fotocopialo eno mismu archivu.

-Comu vereis,se trata dun-ha acta notarial levantá en Sevilla poro cura i notariu mayol da "Ordin de San Xuan" (D. Juan Ramirez Bustamante), en juliu de mil seisdentus setenta. O mutivu: nombramentu d’ún novu miembru -religioxu-, p’antral ena "Ordin de San Xuan".Sendu Gran Prior d’esta ordin eno reinu de Castilla i León: S.A. Xuan de Austria (filhu bastardu de Filipi IV). -¡nun poi sel otru!-.

Pa noxotrus,istu nun tendría maiol trascendencia; si nún se mencionara, qu’o prioratu da ordin do "Santu Sepulcru" da Ciai , dipindía da Encomienda do Lugal. Istu,nos dá un-ha ve máis testimoniu; de qu’o nosu Lugal tuvu un pasau importanti.

Ena primeira Cruzá : finais do ondi , principiu do dodi,nacin as órdinis religioxu/militar mais importantis i qu’algun-has,inda están prexentís ena actualiai –tan sólu,han cambiau o hábitu poro traji d’Armani-.Estas son: Templi, San Xuan, Santu Sepulcru, San Ladaru i Teutónica,-esta última algu máis tardi-. Toas, nacin en terra santa i d’ún solu árbul; pues, os ubjitivus d’estas órdinis, son de sobra cunhucíus por tos.

Esti acta notarial, se compón de duas páginas máis,peru sólu enesta se menciona o Lugal.Si alguin está interexau en leela completa,con mutu gustu vos a envíu.

-¡Bueno!, vistu istu, quea ben claru qu’o nosu Comendaol era persoa de gran influencia. -O que significa; que godaba d’información privilegiá . Pues, según didin as lenguas de dobli filu: era bastanti avispau i montó un-ha agencia de detictivis cuandu deisó o cargu –así, cualquera-.

Soidi a tos

Fonti Nova