San Martín de Trevejo - Caceres

Entoncis estaba enfáu con o administraol (dueño, amu, señol...) de esti foru, y se me ocurriran estas rimas, a propósitu de aquel roibu da mullel de Trevellu que dó lugal a certas proposiciôs (honestas, cumu nun puiría sel de otra forma), de muali o nomi a nosu lugal.
Agô, que teñu eiu perdoáu a o administraol (....ponéi vosotrus os sinónimus...), as queru participar a os que se metan en esti foru (previa identificación...).
Estas son.

O NOMI DO MEI LUGAL.

Didin que era un-ha mullel
aque roibó aquelas perras.
Mais nun entremus en guerra.
¡pos qué levamus a fel!.

O roibu da trevellana
pareci que da lugal
amuali o nomi a o lugal,
y querel fel filigranas.

Que si “d´a Serra de Gata”,
Que si le idimus “D´os viñus”.
Encrucijá de camiñus
que a niñun sitiu nos ata.

¿”De Xálima” San Martín?,
¿o quizá sólu “da Serra”?.
O cambiu sempris encerra
gastus, molestias sin fin.

¿Y si femus un-ha instancia
as nosas autoriáis?.
Obremus con libertái,
pero con muta elegancia.

Datus aporta Nachitu;
Fincacha nos pon cordura;
y tamén con compostura
argumenta o amigu Chitu.

Con paricíus argumentus,
mutus nomis de o lugal,
¿pensas que había que cambial
agora en esti momentu?.

O quentamentu global,
¿ha de fel que as “Fontis Quentis”
se chamin “Fontis Ardentis”,
o que o nomi siga igual?

Cuandu éramos dagáis,
tiña o nomi de Conventu
esi lindu monumentu
que pâ Crú bindita hay.

Y si os frailis ya se foran,
¿cúmu le puemus chamal
a esi sitiu singulal,
que muta xienti valora?

Y cumu fai mutus anus,
que se chama “CartaVella”,
nun queru entral en querellas,
¿"Carta Ancestral" le chamamus?

Cuandu éramus dagáis
a “Fonti Nova” tal era,
¿agora quizá debera
ser “Fonti Vella” por máis?

Si pâ lí pa “calli A Fonti”
nun ves niñun manantial.
¿Nun pensas que hai que cambial,
y poñel “Camiñu o Monti”?

Apenas ya quean cabalus,
ni mús, ni facas, ni burrus;
¿le puemus pil a o “Baturru”,
qué o “d´a Palla” hai que quitalo?

En tempus de tiu Fortoxu,
“Novu o Barriu” quizá fora.
Mais en os tempus de agora
¿é "vellu" o quizá "añosu"?

Antis a “Calzá o Conventu”
era un camiñu de peiras;
agora por máis que queiras
É un camiñu de cementu.

Si a mili ya se acabó
Con “Os Quintus” ¿qué fairemus?
¿qué otru nomi la poñemus
que nos poa gustal a tôs?

¿Por qué idili “Sardiñeira”,
si pâli nun hai pescáus?
buscaremus pâ otru lau
entre as veirás y entre as peiras.

O "Val de Valencia" está
mui lonxi de esa ciái.
¡Teñamus pues humildai
Cambiánduli o nomi ya!.

¿Dondi estaba a “Calli o Meiu”
en tempus de Biniditu?
Agô está ladeá un puiquitu:
¿Otru nomi, é o remeiu?.

Si por cualquel circunstancia
Ves que cambia a situación;
Nun saquis a conclusión
ni caias en a ignorancia.

O que fideran os vellus
debemu dexialo estal.
¡O NOMI DE ESTI LUGAL
É SAN MARTÍN DE TREVELLU!.

Boas tardis teñáis tôs cuantus sois.

P.D.
Ei tamén creu que Chenchi acerta en propoñel o campanariu cumu lugal idela pâ ubicación de a cámara Web. Entre otras coisas estaría fora d´o alcanci de certus "artistas", aficionáus a causal mal.

BOAS NOITIS:
O Milanu nun entra en si debin cambialsi os nomis, de o lugal y de os que cita aquí, pero si cree acordarse de muchos nombris de sitius, a dondi, cuando era pequenu, estuvu.
Tamen O Milanu, dispois de mutus días sin vel o Foru, le gustaría saber como se ve la cámara de la que falan aquí
Saludus
O MILANU

Boas mañás teñan os Foristas:
En primer lugal queru felicital a "Brodas", pol estas "rimas" que arriman mutu con o nomi de o nosu Lugal. E vó que surjan temas y se debatan, isu quel idel que hay diálogu y que os foristas aportemus ideas y que logu tú aproveitis pa fel "rimas".
Segundu. Vamus a informal a o "Milanu":
Pa entral en a cámara web de o Lugal:Tes que buscal en Google o siguienti:https://ww.extremaduravista.com/web/.
2º. Pinchar en:Extremaduravista.
3º. Pinchar en: Localizador
4º. Pinchar: Sierra de Gata.
4º. Pinchar: San Martín de Trevejo y aei ya te aparecerá a cámara vendu o nosu Lugaritu.
De acordu amigu "Milanu"
Soidi a Fala.
Chalrrieira.

Amigu Brodas: Nun poyu menus de felicitarti por as duas últimas poesias que nos has postu,creu que dibiamus coleccionar tos estas coisas tan ben feitas,pues a verdai que coñocis ben to terminu de San Martin y toas as callis. De ti se poi esperar istu,primeiru a tua formación,segundo netu de Tiu Fernandu o Zapateiru y por si era poicu familia de os peseteirus,tes to a favor pa ser un poeta,que sigas deleitandunus con esas poesias.Brodas a miña Felicitación y un OLE que creu o merecis muy ben. Un abrazu pa ti y comu sempris AUPA a FALA.
El Salto

-Hola Tíu Fernandu!!. Comu de custumbri: vos,sempris nos sorprendeis conalgu gratu. -¡Mui guapas esas rimas!-.

Hubu duas manhegas cuya amistai foi inquebrantabli,estas eran: tua güela Juliana i minha güela Inocencia.

Cuandu has mencionau a Caxa Sorda -se chamaba así, poro solitaria qu’estaba-, nun he puíu por menus de recordal as temporás qu’ena infancia pasaba con minha güela alí. Elis,eran os vaqueirus do buticariu i l’asignorin a Caxa Sorda pa vivil. ¡Pues, nun creas que to mundu eno Lugal sabi dondi está!.

Os recordus d’aquela temprana edai minha, se perdin ena noiti dos tempus. Algun-hos mui entranhablis; otrus nun tantu. O que máis prexentí tenhu, é, o d’un pastor da trashumancia;se chamaba Xuán i era castelhanu. Pues esti bo homi, cuandu regrexaba pora tardi conas ovelhas,me treya hovus de pirdí, i que minha güela algun-has vedis mos frixia i otras me feya turtilha. Pora noiti: arreol do fogu,me contaba historias de lobus qu’atacaban as ovelhas i comu os perrus as difindían… -¡ya sabis!, esas historias que cuandu tas contan os mayoris,te queas cona boca aberta i deseandu que nun acabin nunca... Tal ve, o milhol recordu que tenhu d’aquel gran homi, foi un-ha flauta que me fidu;¡era precioxa! – así me parecei sempris-, ma fidu de sabugueiru i grabá a fogu.

Píu perdón a esti foru, por ponhel un tema personal comu esti aquí; ha síu o amigu Brodas cona sua magistral expoxición de rimas, que m’ha feitu revivil tempus da ninhez , recordandu a un homi que me dó mutu carinhu i qu'hasta esti momentu nun había tíu a ocaxión ni o lugal dondi exprexali a minha gratitud. Estoi seguru,que Dios o habrá premiau conún ricón eno Paraisu -sin duda miricíu-.

O recordu máis amargu d’aquela época: é qu’encerta ocaxión me levó a cricía do ríu. ¡Bueno!,esa é otra historia i debi sel contá enotra ocaxión.

Soidi a tos.

FONTI NOVA

Istu é simplimenti pâ tratal de coprobal si, agora, se poi comental algu, sin registralsi.
Pareci que sí,pero nun o entendu: antis puías entral a leel en o foru, sin estal registráu y tiñas que ser registráa pâ poel "falal".
Agô nun fai falta ni un-ha coissa ni otra.
Que teñais un bo día

Brodas, me gusta leer tus rimas, tienen el ritmo de la buena tertulia mañega, esa con la que se brinda entre los muros de nuestras pichorras, esas que dan salud y armonía al cuerpo y al alma de este foro mañego. Traes con tus rimas aire fresco a la vida de este parral mañego y con atención te leo...


Saludos a todos los foristas.

O Parral

Mui boas estas rimas amigu i parenti BRODAS, ya nun se que calificativu te pundria, porque cà ve que pos algu te sobrepasas, se ve que tes mui boa memoria i bo instintu de orientacion, pero nun me cambis niñun nomi porque o original sempris e o millol.Tamen pensu que siria un-ha gran perdida (catastrufi) pa esti foru si te huberas retirau por culpa de esti .....

Forti abrazu

Un saluu pa tos os furistas i soidi pa fala

M/E

Hola Brodas, aunque no te conozca, me han gustado mucho tus rimas donde nombras calles y parajes del pueblo. Está muy bien esta poesía. Sigue deleitándonos con ellas, tienes "madera" de poeta y espero que a nadie se le ocurra cambiarle el nombre a San Martin, aunque en tiempos se llamara Sa Martin dos Vinhus como he leído en algún libro con la historia del pueblo. Sa Martin de Trevellu o San Martin de Trevejo en castellano es el nombre que ha de tener. Respecto a lo de la cámara web, estoy de acuerto contigo y creo que el campanario sería un lugar perfecto donde instalarla, he ido a la página donde estaba y veo que sigue sin funcionar, no sé donde la tendrán instalada ahora pero creo que en el campanario estaría a salvo si no de las inclemencias del tiempo, si de las gamberradas de algunos.
Saludos de una mañega de corazón.