San Martín de Trevejo - Caceres

Comu nun sabría dondi colocal esti escritu, si, eno tema: "Foto: O MAPA" o "INFORMACIÓN". He pensau,qu’o milhol, é abril un novu conos dois.

Amigu Chalrrieira: que consti,que te respondu por aluxiós; si qués, que nos vayamus de vinhus pora Cava Baisa,con mutu gustu te complaceré. Pero o que nunca estaré dispostu ,será, a dalti o mei votu pa cambial o nomi de San Martín de Trevelhu poro de San Martín da Serra de Gata.

-Que pasaría,si o protagunismu qu’agora ten a Serra de Gata-que nun é tantu-, dexapareci dentru de oitu, de,quindi anus... ¿ Vulvirías a cambialo?. Según tú, o que te impulsa a que o nomi de Trevelhu dexaparezca, é: que sólu nos trai inconvenientis poro o poicu que significa; que o únicu que nos dá é un-ha imagin de pobreza ,mui poicu recomendá pa estis tempus.- Bueno!, si de estatus se trata, ¿por qué quealnus cono de Serra de Gata?. -¿Por qué, nun le ponhemus "San Martín da Serra da Estrela"?. Pues esta prometi mutu máis, con pistas d’esquí,bos hoteis...I cuandu esta decaya, le pondremus San Martín de Serra Nevá o de Serra Morena i así sucesivamenti.

Didis: dispois de contal cona aprobación da mayuría do foru, se poi fel un sondeu eno Lugal (pa vel que opinan alí) . Pues, ei t’aconselhu qu’o primeiru en sel cunsultau sea o nosu patrón "San Martín".Puestu que él en certa ocaxión; partí a sua capa pora mitad pa dalsela a un necesitau qu’estaba tiritandu de fríu.¿Comu vamus a convencelo, pa que agora deisemus ena estacá a Trevelhu poro solu feitu de sel pobri?. Nun dudaría un momentu, en baisalsi do retablu,agarral o pindil i dilsi pa Trevelhu pa formal un novu Lugal que diga: "San Martín i Trevelhu". Queandu solamenti a entrá do nosu,un letreiru que diga: "LA LEYENDA DEL PUEBLO SIN NOMBRE".

Apuntas,que hai un refrán Castelhanu que didi: "máis vali estal solu que…)" ;tamén hai otru que didi: "vali máis estal ben acompanhau que solu".

En cuantu o final da película: "Sólo ante el peligro".Él, abandona o Lugal porque antis o Lugal había deisau sólu a él. A tí, nun t’abandona naidi,eris tú, quin nos deisa i nos cambias por otru ; a tí, se te necesita aquí; en "San Martín de Trevelhu",dondi abristis os olhus por primeira ve, aquí dondi acarreabas furnixa po fornu, aquí dondi le eitasti un-ha mirá a primeira manhega que te gustaba, aquí dondi dabas a tabarra cona chalrrieira que te fidu Lalu,aquí dondi tocabas aquela armónica que te truxeran de Purtugal. Porque eno fondu, é a San Martín de Trevelhu o que tú qués, i nun a ninhún otru.

Forti abrazu

FONTI NOVA "Era do Cordeiru" (Cerrumicli dixit)

PD. Si veis poro Lugal algún homi con cota de malha,hábitu blancu i un-ha cru colorá en peitu i espalda. Nun é un disfrá de carnaval,sinon un Cabalheru Templariu en misión de rescati ; pues ha empezau un-ha nova Cruzá.

Estimau amigu Fontinova:
Nun sé si as liiu ven os meis correus: En niñún correo mei renunciu a ná de San Martín. Repitu"Nun renuncio a ná de San Martín". He naciu, he criciu, dí as primeiras patás a o balón; me tirorin una pelota pa o tellau de a Sacristia de a Igleisia. Foi a Escuela de D. Ciprianu; a Catequesis de D. Eduardu. Simbrí oliveiras. Acarrií furnisia, cumu tú ben sabis, con dois cabalus ven valentis. Tíñamus una perra que le chamábamus "Curra". Labrí, riguí, sachí. Acarrií pastu, en o mei Lugal San Martín. Nun renuncio a ná de istu. Si estoy muy Orgullusu, pero que muy orgullosu de a via que he levau en o Lugal que me crií. Me levantí a amasal o pan. Foi a chamal, ven pequenu, a Julián que vivía en a otra punta de o Lugal.etc. Cuñuicí, gracias a Dios a Meis Pairis.
Os pueblus, cumu to han diu cambiandu. Oixi está ven pintau: Fai 40 ó 50 anus había paredis de casas en ma estau; oixi están ben. As persoas vistin de otra forma; oixi rara e a familia que nun te cochi. Antis había cabalus y burrus, pero estis animalitus van desaparecendu.
Os cambius son productus de a soceai y de as circunstancias de cá momentu.
Tampocu renuncio a Historia de San Martín. Ni de meis antepasaus progenitoris. Fíjati si soi "mañegu" que hasta mei apelliu, igual que o tei é "Martín", así que temus voas raidis de San Martín.
Pero isu nun quel idel que se pensi en o "Futuru" de o pueblu y cumu tal a denominación de "Trevellu" nun ten apenas representación. En cambiu "Serra de Gata" e o porvenir, porque engloba varius pueblus de a misma comarca y as coisas nun se poin fel solas, tenin que dil acompañás. Por ejemplu: Cooperativas. Nun se poi sel individual; hay que vivil en colectiviai, cuandu se trata de resolver un problema que afecta a varias poblaciós.
En cuantu a o refrán castellanu e: Más vale estal solo que .... Si estás ven acompañau, ya nun necesitas ná mais. Si vás con tua mullel, que mais qués.
Nun te preocupis pol a Serra de Gata, que esa serra tendrá mutus anus de vigencia. Hasta pa entral y vel o Lugal en "Extremaduravista", tes que pasal pol o nomi de "Sierra de Gata".
Bueno Fontinova. Si alguin pateó de joven, os camiñus y caleisas de o lugal, polos mismus pasí ei y a muta honra.
Un saludu.
Chalrrieira.