San Martín de Trevejo - Cáceres

Um'a calhi cum suas vivencias das que vos queru fel partícipis poicu
a poicu i en varius escritus, pos é impusibri que quepan solu en um.
Calhi acolleora preservá dos ventus do norti, na mais dobral a esquina
da calhi a Paia i entral en ela ia se notaba istu, acolheora tamén pol
suas xientis, de noiti era delicau andal pol ela, pos as ludis eran
poicas i num ludian cumu agó, solu tinha um'a bumbilha eno meiu, as otras estaban dondi veis a casa de Casildu i ena esquina da calhi a
Paia, o roiu era mais profundu i enfrenti dondi ei vivia habia um'a
alqueta qu'ali feia um'a revorta deisandu pol a dereita um pasu estreitu
cumu pâ pasal en fila india, ni qué idel da irregulariai das peiras,
reondas i gastas que cuandu chuvia era um milagru telsi em pé i en cundicios normais, narru istu cumu prólugu pâ o que ven despois.
Si se fundia um'a das bumbilhas ia ni vos contu,num se via ni a xiural,
um'a noiti d'estas cum toas as más condicions xiuntas i ademais negra
cumu boca de lobu, vinha o pobri Julio "O Marica" pâ enteldelnus, ben molhau i num era poro que chuvia, amparau poros tozos i agarrau a paré
chego hasta nossa porta, baixaba o roiu criciu i desbordau, enesa mesma
revolta que feia acababa o poiu da entrá pâ casa i casoliamenti os tozos, era enesi pricisu sitiu dundi habia que pasal em fila india,
baixo do poiu i quisu agarralsi a paré do curral de tia Fabiana peru
algu num sei ben, quei ena mitai do roiu i sinum baixamus s'afoga,
pol encantu desaparecei a causa d'aquel traspés.
Subi pâ nossa casa i minha mairi le do roipa seca i algu quenti pâ ceal, ia entonau mui amabli do as gracias i me pairi dixu mui baisu i
num se polque, ia que Juliu era sordu o so feia, isu ha pasau purque
te gusta mais o vinhu que aos chivus o leiti, ditu de cabreiru que
foi de dagal, pos Juliu o uiví, agarró o pindil pâ sua casa i sei
idendu, que merda de parenti tenhu, a risa que nos entró a tôs foi
autamática, pos num le divamus a tel en conta aquilu, ao dia siguenti
se le pasó o enfau, ia vinhu a eital um tragu cum mei pairi.
Istu ha siu um relatu de serán, ia nos a feitu a digestión desi almodu
de freixons secus cum tôs os sacramentus agregaus, tuicinhu,custela, chuirizu de hosu, murcela, marrana i chuirizu dos bos, menus mal a cupita d'aguardienti, boas noitis i hasta manhan si Dios quel, tapeivus ben, a noiti esta mui fria i esta casa num guarda calol, idia mei
pairi, claru qu'o calol o levabamus postu.

¡Jo Nachitu! En esta mañan, fria dondi as haya de Sevilla,m0 has quitau, por lo menus a musuculu da barriga por o que me he riu lendu o secediu que contas, describinduo del tal maneira que veu esa escena que, como vidiñu cercanu, me soa por habelo contau tua mairi, seguru e o grifu de miña porta o dia siguienti cuandu tuvera que dil a por agua, me soa y teñu que idelti que, efectivamenti era sordu o tal Juliu, pero sabia lel en los labius, por isu, nun me extraña que entendera que tei pairi, que tiña gracia pa paral un tren, disera o que relatas pero, quiza, empezandu a frasi " esti m.r.c.nazu..." ¿non?.En fin que, ademais de bo cava, tes arti tu tamen. Un abrazu Chitu.

A casita que siguia a de Xuliu, qu'asi se di en manhegu, era a de tia Inés a Patilheixa, casá cum tiu Ezequiel o Mixtu, parenta de mei güelu
i de Xuliu, pos vinha a nossa casa caicuandu de serán.
Um'a noiti sentaus aoreol da peira o fogu, estában, tia Inés, tia Rogelia hermana de mei güelu i pol supostu él, tiu Luis O Culapás.
A xiarra de vinhu diva i vinha mentras se feia a céa, entri tia Rogelia
i mei güelu, ia tia Rogelia tinha um'os coloris qu'ei pensaba inocéntimenti qu'eran poro calol do fogu, pos nóm, de repenti s'emocionó
i le vinhu a memoria da infancia, idenduli a mei güelu, ló Luis, t'acordas que buninu i que lindu era Xuliu de piquininu, cúmu xiugabamus tôs os primus cum él, mei güelu carraspeó i parecei desertal, pos ia andaba dandu cabezadus i diixu, e verdáis hermana, quen diva a dal que de maiol diva a sel um mariconazu tan grandi.
Naidi dos presentis pû contel a risa, tia Inés que mais d'um'a vé
l'habia riprindiu a Xuliu, remató idendu, e um'a diviliai que ten.
Pos estas i otras coissas nos axuaban agarral o sonhu enesas noitis
d'envernu, tamén o cheiru do candíl de carburu que deixaba tia Inés eno patín de casa, que nus punhia meiu colocaus.
Boas noitis i hasta manhán si Dios quel, soidi pâ tôs.