San Martín de Trevejo - Caceres

Amigus y paisanus:
Esta tardi as 4,30 ha siu o funeral y enterru de Mingu, estaba a iglesia chea, mutísima yenti do lugal, de as Ellas, de Badajoz y de mais pueblus de a provincia, segun dixu, Domingu a finalizar o funeral, que tubu agran fortaleda de subir agradecer a asistencia de tos y de idil que cumu creyentis que son y a pesar de o dolor de perdel un fillu, contaba con a Misericordia de Dios. Hubu un silenciu impresionanti escutando falal, y de verdais que he un ha persoa muy creyenti, y escutal o que dixu con o fillu de corpu presenti, he un ejemplu de persoa cristiana, practicanti, que bo ejemplu nos ha dau a tos que estabamus alí esta tardi.
Tamen dixu que tos temus defectus y o sey fillu tamen, pero que le encantaba pintal a Mingu, y le gustaban mutu as ludis en as pinturas y que sempris as buscaba, que agora nosu Señol le fairia vel a lu de encontrarsi con El. Mais o menus con estas palabras o dixu.

DEDICAU A MINGU:
Desde dondi estés, deseu que estés feliz, tranquilu, te as diu en plena juventud, mutus hemus eitau lágrimas de dolor, nun me importa idilo. Tos temus defectus cumu dixu tei pairi dispinduti, y nun te importi cualis hayan siu os teis, quin esté libri de elis, que tiri a primeira peira.
Pa mi senpris que me encontraba con tigu tiñas un ha palabra amabli, y cumu te sentabas o sol en a plaza con Chencha y Luisa, y en o poyu de peira debaixu de a farmacia, mutas tardis falandu con elas, y vos tirabis mutas horas alí os tres.
Y cumu recordu fay poicus dias cuandu entrastis a tenda y te regalí un roscón de Reyis, hasta te emocionastis y me destis un apretón de man.
Desde ei arriba tendrás un ha prespectiva muy grandi do lugal, que sigas pintandu, y agora te será mais facil ver as ludis y as sombras, y por supostu o amor tan grandi que te tenin teis pairis Domingu y Paula, cumu así teis hermanus.
Algún dia tos nos encontraremus dondi tu ya estás, y ya nos pois tel un ha boa colección de as tuas pinturas, que nun habrá fotografia o retratu do nosu lugal que as superi.
¡¡Hasta sempris amigu MINGU!!