San Martín de Trevejo - Caceres

Dispois de lel o pesami de Chenchu a os familiaris de a ultima fallicia, se me ocurri que esti forú, aunque solu fora por o que temus de común con as nosas formas de expresión oral, estaría ben que de forma misiva, tos os que aquí participamus deramus muestras de solidaríai y afectu con as víctimas da Tragedia de Galicia. Son mutas mortis y mutu dolor o que se han produdiu pa que permanezcamus impasiblis ante tantu sufrimentu; por istu unha pequena muestra de afectu, aunque sea desde aquí con un pequenu textu, quizá sirva pa aminorar a pena dos que sufrín as pérdidas de seris quirius o se sintan millól en sua recuperación. Un abrazu pa tos elis y resignación . Chitu

Tamén me unu a esi abrazu pa tós os familiaris que han sufriu tan duru golpi, mais da maneira que ha siu, esperu que Dios les dé forza pa intental superal tan grandis perdidas, desde aquí mei mais sintiu pexami pa tós os galegus.

Marivi.

Chitu:

Compartu por enteiru o sintimentu de dolor hacia os familiaris dos falhicíus.

-Ha síu un-ha tragedia. Creu,que algu así nun se ulviará facilmenti.

Si Dios quel, dentru de un-hos días estaré p'oresas terras. Claru está, que dedicaré un-ha oración a toas as víctimas.

Forti abrazu.

PD. Esta tragedia puía habelsi evitau.

Mei mai sitiu pésami a toas as FAMILIAS DE ESI TRAGICU ACCIDENTI.
Claru que se puia habel evitau, mandandu pa casa a esi maquinista o primel día que o sacó en e red. Pos sendu culpabli solu se le poin piil de un anu a cuatru.
Forti abrazu.

Nun recordu que anu foi. Comu tampocu recordu, si era ena Cru o San Martinhu.(ei inda era pequenu).
Entri o pilón do Forti i a porta do mateiru, habian montau un-ha atracción de feria; d’esas que giran i os asentus van colgaus de cadeas (carrusel, o algu así). Un homi da serra, s’ulvió d’abrochalsi. Cuandu o sistema empezó a giral i alcanzó certa velociai "velocidad angular" o homi: por efectu da forza centrífuga sai dispíu con un-ha trayectoria tangencial estrelandusi contra a paré da caxa de tia María. O lenhadu que se pegó foi de campeonatu, queandu eno solu espatarrau c’omun sapu. –As cauxas: as supi anus mais tardi.

Ponhu esti simil, porque o accidenti do tren ocurría de forma similar. O tren, circulaba a un-ha velociai “lineal”de centu noventa Km/h (según han informau) .Sin cambial esta velociai, entra en un-ha curva que según didin é d’un radiu de quinientus metrus ( pa un-ha vía de tren de velociai alta, é un radiu pequenu). En o mismu instanti qu’o tren entra ena curva, a velociai deisa de sel "lineal" i pasa a sel angular. -Impusibli d’aguantal as roas adherencia a os carrís. Os vagós sain dispíus tangencialmenti i s’estrelan contra o muru.

A principiu d’esti mismu mes, en Tornadizo (Ávila) un autobús se sai da calzá en un-ha curva i deisa novi mortus. A versión oficial: o conductor se durmí o se despista, i o autobús se sai pora dereita ena curva i vai rozandu poro o alud de terra duranti decenas de metrus. Un supervivienti didi qu’entró ena curva con demaxiá velociai. O mei puntu de vista: tantu o accidenti d’esti autobús, comu o do tren, tenin a misma cauxa común. Pasal de un-ha excesiva velociai lineal, a otra angular sin reducila.

Pensu, que to conductor: ben sea de tren, autobús… Que dependan de él a vía de persoas. A normativa, tindría que exigil cunhucimentus elementais de física entri otras aptitudis.

É d’desperal, qu’agora empeci o protocolu pa determinal as cauxas que provocorin o accidenti. Nun é, pues, secretu pa naidi que foi un excexu de velociai. ¿Por qué o maquinista mantuvu esa velociai hasta entral ena curva?. ¿ Estaba distreidu en otras coixas? -Él ha seidu vivu i podrá explicalo. Pa mí, nun siría válidu si argumentara un falhu do sistema automáticu; porque sempris está o sistema manual pas emergencias.Por tantu, él é o maximu responsabli d’esta tragedia.

Baisu o mei puntu de vista: a companhía nun está exenta de responsabiliai. En lineas aéreas, marítimas, autobuxis de largu recurríu…, dondi viáixan gran númeru de persoas i a responsabiliai é grandi. Sempris hai mais de un conductor. ¿Por qué aquí había solu un?.

En fin, que consti qu’o que aquí esponhu, é un puntu de vista mui personal. Seguramenti, existiran otras opinios dignas de tel en conta.

Forti abrazu.

Hola Fontinova: Pa reforzal a tua teoría te contu: Tinha un amigo propietariu de cabalus que feyan rutas con os turistas. Siría con trenta anus, mais ao menus, en un día de asuetu me foi a dal un paseu con elis. En unha recta ei me fidi o "galitu" y me pegui un galopi, peru estis animalitus tenin a querencia de siguil a ruta de senpris y a final en una pequena curva ei sigui rectu y o caballu por o sei camihu.
Resultau: Fidi o ridiculu, un costaladu que, gracias a Dios nun me joei ninhun-a custela o algu piol.
Isu pareci sel que le pasó a o maquinista, peru vamus a esperal o resultau das investigaciós judiciais. O piol de to e que a os mortus ya nus os poemus recuperal.Os familiaris tendrán grabá esa fecha toa a via por mutas indemnizaciós que reciban.
Forti abrazu.

P.D. Chitu: Ben puis dal tua opinió de jurista. Un abrazu pa toa a familia.
Muñu: Esperu nuticias tuas.

Bos dias a tos, antis de partil cerca do mar.Nun teñu datus suficitis como pa emitir unha opinion o dictámin de tipu jurídicu sin cometelalgún error,aunque, a primeira vista, hay responsabiliai por imprudencia sin duda simpli, quizá hasta temeraria si se proba que poendu o maquinista nu redudí a veluciai. Poerán coincidir otra seri de o que se chaman " concausas" o causas coadjuvantis que, toas juntas, propiciorin esi lamentabli sucesu.Falta fel un informi pericial muy concretu de, estau das vias, das roas do convoy y dos sistemas de seguriai en general, pero solu a efectus de responsabiliai civil, por que, entendu, que non hay mais conducta punitiva que a do que, poendu,nun fidu o que tiña que fel, estal atentu a conducción,<cuestion que trasladua a o tráficu viariu e o elementu mais importanti que apareci en un 90% dos casus en a producion accientis de tráficu, tema en o que, como sabeis soy especialista, tamen en esti da responsabiliai civil deriva de unha conduca penal, como he a que nos ocupa. As victimas vivas y os parentis dos fallicius, percibirán a indemnización que les corresponda, según os casus,un solu por o segurus de viaxeirus sinon por os que tenin contratais, Renfi y demais organismus implicaus, pero esa e otra cuestión que, como ya se didi en esta conversación, nun vay a fel que os mortus volvan ni que se ulviin os vivus de esti terribli tranci. Ya se dirán publicando datus das diligencis judiciais y asi, como pasa sempris, hasta quin nun teña ni idea de qué vay a coisa formulará sua opinion, como a mais acertá de toas. Na mas por agó. Soidi pa tos y hasta o lugal en unhos dias, Chitu.