Un anu mais o Patrón Ya en o lugal de residencia habitual, dispois de resaca y viaxi, ten un tempu, fendu na mais que justicia, de agradecel, en primer lugal as Mayordomas, por o ben que han organizau to, ¡ con qué ilusión levaban una semana traballandu por que to seira a pil de boca ¡, como asi foi, a pil de boca, por que en o ágapi con o que nos deleitorin dispois de misa nun faltaba de na, migas, callus, pinchus diversus de chacina, canapés, dulcis locais. viñus ricus refrescus varius y un monton de coisas mais adornas con la amabiliai de toas as amas de casa mayordomas que, en mais de un casu, acompañas por suas parellas, se desvivian por atendel a to mundu, ofrecendu cumia y vivia. En segundu lugal y ya en general, a to lugal, pan un queal a nidi patras dos que invitaban as boigas, por que era to o lugal o que se encontraba en a calli fendu festa y , o que o tiña, ofrecendu viñu y boigas dondi comel y bebel, solu vos digu que, ei, que foi bastanti comediu, eran as oitu y meya de a tardi y me retiraba ya por que si nun me retiru me tenin que retiral. To muy ben, musica y amigus y cuñucius tos en armonia, sin niñun problema divirtindusi sanamenti y, ya a o final, rechazando cumia y bibia por que nun se puia mais. A xentí de fora que era a primeira ve que diva a o lugal, comentaba que tal coisa nun se habia vistu en niñún lau, tanta amabiliai y generosiai de to mundu, tantu con que se cuñucía como con quen non. En fin, ejemplu dan os mañegus de a generosa conducta de sei patrón. Como ya se ha falau do explendorosu da festa religiosa, que verdadeiramenti asi foi por que tantu Igleixa como procesión, estaban de boti en boti, ei me he centrau en a Civil, que tamén honraba a o nosu patrón, tantu o dia grandi como o pequenu, en o que se acabó de arrebañal to y en esti casu con un bailoteu de meu en o Centru parroquial dondi as mayordomas deran o banqueti. Sana envidia pa os que nun poeran estal y que se animin pa o anu que ven. Soidi pa tos y pa a fala. Chitu. |