Romangordo - Caceres

Yo no sé qué tieni,
qué tieni esta tierra
de la extremaúra
que cuantis que llegan
estos emprencipios
de la primavera,
se me poni la sangre encendía
que cuasi me quema,
se me jincha la caja del pecho,
se me jaci más grandi la juerza
se me poni la frente möorra
y barruntu que ansina me entra
como un jormiguillo
que me jormiguea...
¡Y luego unas ansias:
que me ajogan de juerti que aprietan
con arrempujonis
de lloral sin querel, que me quean
que cuasis reviento
sin poel revental de la pena!...
¡Me dan unas ganas
de metermi con cosas de juerza!...
¡Asín jundo el corti
de la segureja,
que lo mesmu ha caíu esta encina
que si juesi de pura manteca!
Yo no sé qué será lo que adrento
me escarabajea
cuantis llega esti tiempo tan güeno
de la primavera...
Digu yo que serán estos vahus
que jecha la tierra,
que güelin a ricos
y paice que, asín que se cuelan,
comu que arrempujan
de adrento pa juera,
y levantan el pecho pa arriba,
y entontecin de gustu que quean...
¡Juy, cómu me sabin!...
¡Juy, Dios, y qué juerza!
Si viniese ahora mesmu aquí el Gorio
y quisiesi luchal una güelta...
¡Juy, Dios, qué Goriazo
le jacía pintal en la tierra!
Me gusta esti tiempo
de la primavera,
pero, ¡cono!, me da mucha rabia
no tenel una cosa que puea
sacalmi del cuelpo
el comuelgo na más de la juerzN

¡Me giedin los hombris
que son medio jembras!

Cien vecis te ije
que no se lo dieras;
que al chiquín lo jacían marica
las gentis aquellas. .

Ahora ya lo vide, y a mi no me mandis
más vecis que güelva.

Te largas tú a velo,
que pué que no creas
que tu cuerpo ha parío aquel mozo,
ni que lo cebasti Con tu lechi mesma,
ni que tieni metía en la entraña
sangri de mis venas.

N'amas de mimarros
y delicaezas
se ha queao lo mesmo que un jilo
paliúcho y sin chispa de juerza.

Cá instanti se lava,
cá inslanti se peina,
cá instanti se múa
toa la vestimenta,
y se encrespa los pelos con jierros
que se lo retuestan,
en los dientis se da con boticas
de unos cacharrinos que tieni en la mesa,
y remoja el moquero con pringuis
n'amás pa que güela.

¡Giedi a señorita
dendi media legua!

Se levanta a las nuevi corrías
y a las doci lo menos se acuesta.

¡Va a ponersi pochu
si acotina de aquella manera!

¡Güeno está pa mandalo a bellotas,
pa ayualmi a escuajal en la jesa,
pa jacel un carguju de tarmas
y traélo a cuestas,
u pa estalsi cavando canchális
dende que amaneci jasta que escureza!

Los muchachos de acá me esconfio
que mos lo apedrean
cuantis venga jaciendo pinturas
u jablando de aquella manera,
y verás cómo el mozo no tieni
ni agallas ni juerza
pa el primero que quiera moflarsi
rompeli la jeta.

Ya no dici padri,
ni madri, ni agüela.

"Mi papá, mi mamá, mi abuelita..."
así chalrotea,
como si el mocoso juesi un señoruco
de los de nacencia,
ni mienta del pueblo, ni jace otro oficio
que dil a una escuela
y palral e bobás que allí aprendi,
que pa ná le sirvin cuantis que se venga.

Pa sabel sus saberis le ije:
"Sácame la cuenta
del aceiti que hogaño mos toca
del lagal po la parti que es nuestra.

Se maquilan sesenta cuartillos
p'acá parti entera,
y nosotros tenemos, ya sabis,
una media tercia
que tu madre hereó de una quinta
que tenía su agüela Teresa.

¡Ya ves tú que se jaci en un verbo!
Sesenta la entera,
doci pa la quinta,
cuatru pa la tercia,
quita dos pa una media, y resultan
dos pa la otra media.

Pus el mozu empringó tres papelis
de rayas y letras
y pa ensenrearsi
de aquella maeja
ijo que el aceiti que a mi me tocaba
era "pi menus erre", ¿te enteras?

¡Pus pués dil jacindu
las sopas con ella!

¿Y esos son saberis?
¡Esas son fachendas!

No le quise mental del guarrapo
ni icile siquiera
que hogañazo vendimos el churru
pa compral un cachuju de tierra.

¡Allí no se jabla

de esas cosas ni en ellas se piensa!

N'amás que se jaci comel confituras
melcal vestimentas,
dirse a los cafesis,
dirse a las comedias
y palral de bobas que no valin
ni siquá una perra.

¡Jolgacián como el nuestro muchacho
no va a habelo, si aquí no se almienda!

Yo no lo distingo de otros señorinos
que con él se ajuntan y jolgacianean.

¡Son como maricas¡
¡Júy, qué vestimentas!
Ves una presona
por detrás, en la calli, tan tiesa
y endi lejus no sabis de cierto
si es macho u es jembra.

Güelen a lo mesmu
como las ovejas,
y p'aquí no es asín, que cá cosa
güele a su manera:
güeli a macho la carni de hombri
y la carni de jembra da a jembra.

Hay que dil a buscar al muchacho
cuantis que se puea,
y le dicis a aquellos señoris
que esu no quita pa que se agraeza,
pero que a su padri le jaci ya falta,
y asín se la enreas.

No lo quió jolgacián, aunque muchos
saberis trujiera.

Y no es esu solu lo que a mí me enrita,
que otras cosas me jacin más mella...
Hay que dil a buscalo cá y cuando,
que venga, que venga,
porque mira, me giedin los hombris
que son medio jembras.

VALSAMO CASERO


Estamos perdíos
no hay que dali güeltas,
que ya estoy mu jarto
de jechal la cuenta,
y cá ves que güelvo
se me poni dolol de cabeza.

-Quico, no te agines.
-Paecis boba, Cleta,
quedrás que me esponji,
u que baile, u que jaga fachenda,
mentris que la genti
mos jaci esta cuenta:
"Dies al escribano,
deciséis al tío Lucio Candela,
nuevi a la comadri
y ocho a tía Endelencia
sin contal los caíos de hogaño,
que entri tó, pues, se arrima a sesenta.

Y no miento al médico
ni al jerrero, que ya se mos quejan,
ni te meto la renta de hogaño,
ni el trimestri, que ya se mos llega,
que sólo de costas
un duru te cuesta.

¡Estamos perdios...
no hay que dali güeltas !

U se vendi el cachujo de casa,,
y en cueros mos quean...

¡U me ajorco y me ajorro de andalmi
jechando más cuentas!

¡ Vamos, no esvaríes,
que ni en groma, ni en groma siquiera
debin de mintalsi
brutás como esa !

Y más que las trampas
tampoco te aprietan
pa que asin te agines,
pa que asin de ajogau te veas.

Verdá que se debin
toas esas gabelas,
pero mira, tenemos posibles
pa pagal sin vendel la jacienda.

Treinta duros quiciás la potranca
te vali en la feria,
tres guarrapos, a cinco, son quinci,
y preñá la lichona mos quea,
entri yo y la muchacha otros cinco
mos ganamos jilanda dos telas,
que quiciás esti ivierno poamos
jilal dos y media,
con los burros, a días perdíos,
tú te sacas tres durus de güebres,
y las miajas de rastras que falta
y el réito que sea,
lo paemos matal con jornalis
de la aceitunera,
de los cavucheos
y de la laveria.

Si asperan un año
no se quea a debel una perra,
y en cuenta no meto
lo primero que para la yegua,
que está sentenciao,
pa si al cabo se cesa Teresa,
que hay que jateala
bien de ropa nueva.

¿No ves cómo sali
pa salil de deudas
sin mental la casa
ni decilmos brutás como aquélla?

¡Hora! Ya lo veo;
no sé jechal cuentas,
porque no pienso en esos rinconis
que a ti te se acuerdan.

Lo que jago es ponelme möorro
cuando doy en quereli dal güeltas,
y con estas que tú me has jechao
me has barrío el dolol de cabeza..

EL CRISTU BENDITU


¿Ondí jueron los tiempos aquellos
que pué que no güelvan,
cuando yo jui presona leía
que jizu comedias
y aleluyas también y cantaris
pa cantalos en una vigüela?
¿Ondi jueran aquellas cosinas
que llamaba ilusionis y eran
a'specie de airinos
que atontá me tenían la mollera?
¿Ondi se jueron aquellos sentires
y las delicaezas
que me jizun llorar como un neni,
de gustu y de pena?
¿Ondi jueron aquellos pensaris
que jacían dolel la cabeza
de puro lo jondus
y enreáos que eran?
Ajuyó tuito aquello pa siempri,
y ya no me quea
más remedio que dilme jaciendo
a esta vía nueva.
Ya no güelvin los tiempos de altoncis
ya no tengo ilusionis de aquellas
ni jago aleluyas,
ni jago comedias,
ni jago cantaris
pa cantalos en una vigüela...!

II

Pensando estas cosas,
que me daban ajogos de pena,
una ves andaba por los olivaris
que la ermita de Cristu roëan.
Triste y aginao
de la ermita me juí pa la vera;
solitaria y abierta la vide
y entrémi por ella.
Con el alma llenita de jielis,
con el pecho jechito una breva
y la cara jaciendo pucheros
lo mesmito que un niño de teta,
juime ampié del Cristu,
me jinque en la tierra,
y jaciendo la crus, recé un Creo
pa que Dios quisiera
jacelme la vía
una miaja tan solo más güena.
¡Qué güeno es el Cristu
de la ermita aquella!
Yo le ije, dispués de rezalí:
-¡Santu Cristu, que yo tengo pena,
que yo vivo tristi
sin sabel de qué tengo tristeza
y me ajogo con estos ansionis
y este jormiguilbo que me jormiguea!
¡Santu Cristu querio del alma!
Tú pasastis las jielis más negras
que ha podido pasal un nacío
pa que tos los malos güenus se golvieran;
pero yo sigo siendo maletu
y a Ti te lo digo lleno de velgüenza
pa que me perdonis
y me jagas entral en verea.
Tú, que estás en la Crus clavaito
pol sel yo maleto, quitame esta pena
que aentru del pecho
me escarabajea!...
¡Jalo asina, gue yo te prometo
acelmí bien güeno pa que Tú me quieras!

III

¡Qué güeno es el Cristu
de la ermita aquella!
Pa jacel más alegri mi vía,
ni dineros me dió ni jacienda,
polque ice la genti que sabi
que la dicha no está en la riqueza.
Ni me jizu marqués, ni menistro,
ni alcaldi siquiera,
pa podel dil a misa el primero
con la ensinia los días de fiesta
y sentalmi a la vera del cura
jacienda fachenda.
¡Pa esas cosas que son de fanfarria
no da nada el Cristu de la ermita aquella!
Pero aquel que jaciendo pucheros
se jinquí en la tierra,
y, dispues dé rezali, le iga
las jielis que tenga,
que se vaiga tranquilo pa casa,
que ha de dali el cristu lo que le convenga.
A mi me dió un hijo
que paeci de rosa y de cera,
como los angelinos que adornan
el retablo mayol de la iglesia.
Un Jabichuelinu
con la cara como una azucena,
una miaja teñía de rosa
pa que entávia más guapo paeza.
A mí me entonteci
cuando alguna risina me jecha
con aquella boquina sin dientis,
rëondina y fresca,
que paecí el cuenquin de una rosa
que se jabrí sola pa si se la besa.
Juy, que boca tan guapa y tan rica!
¡Paecí dé una tenca!
A vecis su madri
en cuerinos del tó me lo quea,
poní un pañali tendio en las sayas
y alli me lo jecha.
¡Paeci un angelíno
de los de la inglesia!
Yo quería que asín, en cueretis,
siempre lo tuviera,
y cuando su madrí vüelví a jatealo,
le igo con pena;
éjalo que bregui,
éjalo que puéa
raneal con las piernas al airi
pa que críe juerza.
¡Ejalo que se esponji un ratino,
que tiempo le quea
pa enliarsi con esos pañalis
que me lo revientan!
¡Ejamelo un rato
pa que yo lo tenga
y le jaga cosinas bonitas
pa que se me ría mientris que pernea!
¡Que gocí, que gocí
tó lo que asín quiera,
que pa jielis, ajogos y aginos
mucho tiempo quea!
¡Ejamelo prontu pa zarandealo!
Ejame el mi mozu pa que yo le meza,
pa que yo le canti,
pa que yo lo duerma
al son de las guapas
tonás de mi tierra,
continas y dulcis,
que páecin zumbíos de abeja,
ruíos de regato,
airí de alaméa,
sonsonetí del trillo en las miesis,
rezumbal de mosconis que vuelan
u cantal dormilón de chicharra
que entontecí de gusto en la siesta...
¡Miále cómo bullí,
miále cómo brega,
miále cómo sabi
ondí está la teta
si conoci que tiení jambrina
dalí una gotera
pa que prontu se jaga tallúo
y amarri los chotos a puro de juerza.
¡Miáli que prontino
jizu ya la presa!
¡Miále como traga, mía que cachetinos
mientris mama en el pecho te pega!
¡Miá que arrempujonis da con la carina
pa que salga la lechi con priesa!
¡Asi jacin también los chotinos
pa que baji el galro seguío y con juerza!
Ya se va jartando. ¡Miá como se ríe,
miále cómo enréa!
Jasta el garguerinu
la lechi le llega,
porque va poniendo cara de jartura
y el piquino del pecho ya eja.
Quítalo en seguía pa que no se empachi
y trai que lo tenga...
¡Clavelino querío del güerto!
ven que yo te quiera,
ven que yo te canti,
ven que yo te duerma,
al ton de las guapas
tonás de mi tierra,
pa que puéas cantalas de mozo
cuando sepas tocal la vigüela.
¡Venga el mi mocino,
venga la mi prenda!
Ven que yo te besí
con delicáeza,
ondí menos te piquin las barbas
pa que no te ajuyas cuando yo te quiera,
ni te llorin los ojos, ni arruguis
ésa cara más fina que séa,
ni te trinquis p'atras enojao
si tu padri en la boca te besa...

IV

Mujer, ¡mié que lindu
cuando ya esté dormio se quea!
¿Tú no sabis porque se sonríe?
Es porque se sueña
que anda con retozus con los angelínos
en la gloria mesma...

V

¡Qué guapo es mi neni!
¡Ya no tengo pena!
¡Qué güeno es el Cristu
de la ermita aquella!

EL EMBARGO


Señol jues, pasi usté más alanti
y que entrin tos esos,
no le dé a usté ansia,
no le dé a usté mieo...
Si venís antiayel a afligila,
sos tumbo a la puerta. ¡Pero ya s'a muerto!
Embargal, embargal los avíos,
que aqui no hay dinero:
lo he gastao en comías pa ella
y en boticas que no le sirvieron,
y eso que me quea.
porque no me dió tiempo a vendello,
ya me está sobrando,
ya me está gediendo.
Embargal esi sacho de pico,
y esas jocis clavas en el techo,
y esa segureja
y esi cacho e liendro...
¡Jerramientas, que no quedí una!
¿Ya pa que las quiero?
Si tuviá que ganalo pa ella,
¡qualisquiá me quitaba a mi eso!
Pero ya no quió vel esi sacho,
esas jocis clavás en el techo,
ni esa segureja
ni ese cacho e liendro...

¡Pero a vel, señol jues: cuidaito
si alguno de esos
es osao de tocalí a esa cama
ondi ella s'a muerto:
la camita ondí yo la he querío
cuando dambos estábamos güenos;
la camita ondi yo la he cuidiao,
la camita ondí estuvo su cuerpo
cuatro meses vivo
y una nochi muerto!

¡Señol jues: que nenguno sea osao
de tocali a esa cama ni un pelo,
porque allí lo jinco
delanti usté mesmo!
Lleváisoslo todu,
todu, menos, eso,
que esas mantas tienin
suól de su cuerpo...
¡y me güelin, me güelin a ella
ca ves que las güelo!..

LA GEDIONDA


Asín jablaba la madri
y asín el hijo jablaba
el hijo ajogao de aginos,
la madri ajogá de lágrimas,
él jechao y ella encogía
a la vera de la cama.
-Si sigues asín penando,
te mueris, hijo del alma,
y si te casas con ella
te jundis y a tós mos matas.
¿Ondi tienis la cabeza,
ondí tienis las entrañas
que no se te jacin migas
de vel las jielis que pasa
tu padri, que tó lo sabi
manque no te dicí nada?
¿Ondí tienis tú los ojos
pa no vel en lo que paras
cuantis que logrí enrealtí
la serpiente que te engaña?
Pa ti no es eso apareníl,
ni ella con tu genti encaja,
ni a ti, Gelipe, te salí
esi rumbo que ella gasta.
Y entávia más malu que eso
es que tiení mala fama,
y a tós los hombris los quieri
y como a ti los ¡alaga,
y acuerdati tú, Gelípí,
que pol jacel cosas malas,
jasta el alcaldi y el cura
quisun del pueblo aventala.
Una mujel que ha venio
de alguna ciudá mundana,
¡Qué habrá jecho pa estal sola
sin naide de la su casta!...
¡Qué habrá jecho! lo que dicin
que jaci aquí: cosas malas,
que e mi me cuesta decilas,
pero a ella jacelas, nada.
Bien sabis tú que la genti
la "Gedihonda" la llama,
porque dícin tós los hombrís
que endi lejos jiedi a mala.
Y tú cieguinu a querela,
y ella jaciendote cara
pa empicarti a su persona
y calentarti la entraña.
¡Y bien que lo ha conseguio!
¡Y bien la genti lo jabla!
¡Y bien se agina tu madri
por ti, Gelipi del alma!
Dicin que bebel te ha jecho
de una bebía mu mala
que a los hombris entontecí
pa hacelos querel sin gana.
Y asín debí sel, Gelipi,
Gelipí de mis entrañas,
que tú eras bueno artinantis
y nunca jielís nos dabas,
y na del mundo sabías,
y siempre quietino en casa,
jasta te daba vergüenza
si de novias te jablaban.
Y jací un año corrío
que eris otro, hijo del alma,
ajuyis de andi tu madri,
duermis pocu, no trabajas,
comes como un pajarino
y ya solino te encamas.
To jué porque te empicaste
a esa serpiente mundana
con la que dicí la gentí
que aunque te matin te casas.
Imí sí es cierto, Gelipi,
pa yo morilme de ansia
pa que se ajogui tu padri,
pa pue se aflija tu hermana,
pa dicilti que te jundis
y deshonras a tu casta,
porque esa mujel perdía
endi lejus jiedi a mala.

II

Asín jablaba la madri,
y el hijo asín contestaba:
Madri, me quieri y la quiero,
manque dicin que es mundana.
Ni pueo ejala a ella
ni a usté quiero yo matala...
¡Ejalmi moril de queo
y queáis iguales dambas!...

CARA AL CIELO




¡Oué nochí tan rica!
¡Qué luna tan guapa!
Cuantis llega esti tiempo, compadri,
no me jago a dormil en mi casa.
Me agino en el patio,
me asfixio en la sala,
los violeros me jacin ronchonis,
me ajogan las mantas
y p'alivio me pongo möorro
cuando da en garreal la muchacha
y su madri en cantali al oído
sin chispa de gana.
¡Y luego un bochorno
que dan cuasi ansias?
-¡No sigas p'alanti,
que lo mesmo, lo mesmo me pasa!
-¡Te digo que hay nochis
que no pueo pegal la pestaña¡
Justamenti me queo traspuesto
cuando va a clarear la mañana,
¡y asín me levanto
con los ojos que escuecin que rabian,
los gúesos molios
la cabeza que asín se me anda
y una derrengueta
que no pueo engiestalmi en la cama!
Pero n'más que vieni el güen tiempo
me esmonto de casa.
La mujel se esconfía que ajuyo
d'ella y la muchacha
pá roncal ondi naide me espierti
y ondi haiga frescanza,
pero yo, pa si cuela, le igo;
¡Quedrás que en la cuadra
se empocheza le pobri la burra
u quedrás que se acabi de flaca!
Bien de mal se me jaci de nochi
jechál caminatas
y aguantal con el cuerpo el recencio
de por las mañanas;
pero a vel: siembochamos la burra
en el tiempo mejol pa que paza,
me dirá que sigún es el cuido
le jechí la carga...
¡Y así se la enreo
cuando dici que ajuyu de casa!
¡Qué noche tan rica!
que luna tan guapa!
No hay ná que me sepa
como estalmi tumbeo a la larga
mirando p'al cielo
y escuchando cantar la caraba,
los capachos, los bujos, los grillos
y también las ranas,
cuando cantan asín algo lejos
que ampié de las charcas
me ponin mborro
con aquel sonsoneti que arman.
¡Miá que está una nochi...
jasta alli de clara!...
¿Quién habrá ¡echo aquello de arriba?
¡Miá que es cosa guapa!
¡Mentira paéci
que no se mos caiga,
porque mira que están las estrellas
en el airi n'amás!
¡Y cuidiao que son unas pocas!
¡Y cuidiao que están todas altas,
que si se cayeran
bien mos estripaban!
¡Y la luna tamién, ¡miá que es cosa!
¡Qué bien ¡echa que tiene la cara!
¡Esa sí que paecí imposibli
que no se mos caiga,
porque está como cuasi esprendía
si te queas parao a mirala!
¡Miá que es cosa esa!
¿Quién dirás que la ha jecho?
-¡Pus vaya
con unas preguntas
que jacis tan cándidas!
¿Pus quién jizu el mundo?
¡Pus Dios! No se n'amás,
porque estoy cuasi ya trascordao
de cómo lo jizu, que bien lo galraba
cuando anduvi de chico a la escuela
aprendiendo esas cosas tan guapas.
Pero tienis al mi Gelipino
que ahora mesmo de golpi te galra
qué jizu Dios hoy,
qué jizu mañana,
qué jizu al desotro..,
y asín te lo acaba.
Yo no pueo palralo seguío,
porque ya la memoria me falle,
y además me se enrea la lengua
con tantas palabras.
-¡Lo mesmo, compadri,
lo mesmo me pasa!
Se me jaci un ñúo
que no pueo siquiá meneala
cuantis güelí que vienin en ringla
dos palabras u tres de las malas.
Pero mira, también yo me acuerdo
dé que altoncis asín lo enseñaban,
y siempre se ha oído
de que Dios jizu el mundo...
-Y mos basta
sabel quién lo jizu,
eso sé yo n'amás.
¡Es que no falta gentí de estudio
que se poni a lleval la contraria!
Mos estaba jerrando las bestias
hogaño en la plaza
don Silvestre, el albéizal, pa dilnus
a la Virgen del Valle a pujala.
¡Juy, Dios, si lo oyís!
¡Juy, cómo gairaba!
Daba gusto oílo,
pero daba tamién repunanza,
porqué jizu tamién de la Virgen
asín como guasa.
Yo no pueo explicalti el sentío
de tantas palabras,
pero vinon a dal a que el mundo
no lo ha jecho el de arriba y que n'amás
que él solu se ha jecho,
pero asín, sin que nadie lo jaga.
¡Miág que es cosa esa
también algo parda!
Entavía le dijo
tío Prudencio cón alguna guasa:
¡Jaga usté las bo las
más chiquinas, que asín no mos pasan!
¡Juy, cómo se pusu!
Mos llamó gentí bruta de rabia,
y mos dijo: "¡El que puea, que aprenda,
que yo tengo pa mí que me basta!"
¡Pus más le valía,
ya que tanto jabla,
aprendel a curalmos las bestias,
polque a mí me queó sin pollanca,
y a Ginio sin burro,
y a ti sin guarrapa!...
¡No la mientes, porque un gabarruño
se me jacin las tripas de rabia!
Di que no jué acuerdo,
cuando tanto galraba ea la plaza,
pero ya verás tú si le igo
cuanti yo me lo jechi a la cara:
¡No se jabla tan mal del de arriba
pa jechalsi usté mesmo alabancias,
que la genti tamién comprendemos
lo que cá uno jaga,
lo que cá uno envente,
lo que cá uno valga...
Y si no, ya ve usté, yo le pongo
esta comparanza:
¡El de arriba mps da los ganaos,
y usté mos lo mata!

EL DESAHUCIADO






¡Estoy ya mu jarto!
Miuste a vel, por favol, señol méico,
si hay alguna cosa
pa estí mal repegoso que tengo,
porque llevo ya asin ocho mesis
maleto, maleto...,
con una singana
y un aginaero,
con una flojera,
con un encaimientu,
que paecí una breva maúra
asti perro cuerpo,
que antis era tan recio y tan duro
como el propio jierro.
Debí estal la mujel aburría
de jacel remedios,
pero yo ni me pongo pirongo
ni de golpí espeno.
La jacienda, tuíta perdía,
los pagos, cayendo,
la mujel y el chiquino escaldaos,
jechos unos negros
que me estoy ajogando d ansionis
n'amás que de velos.
Y pa alivio tó el día mirando
dendi casa la genti del pueblo
p'abajo y p'arriba
pasando y golviendo,
unos con guarrapos,
otros con aperos,
unos con forrají
y otros con istierco,
saliendo y entrándo,
llevando y trujiendo,
como las jormigas
en el jormiguero.
Y ná más yo sólo
enrëao con esto que tengo,
vengan ratos al sol con las tías
enroscao lo mesmo que un perro,
u si no en el corral mancornao
entrí los maeros,
sin jacel ni las sopas que como,
sin ganal ni p'al agua que bebo,
que velgüenza me da que me vean
asín tanto tiempo.
Cuatro vecis quiciás haiga dio
ancá'l curandero,
que me dijo que estaba embargao
y me puso dos parches al pecho
y una bilma de pés y de estopas
en el rengáero.
Y aquí la he tenio
clavá como un perro
¡pa ná!, ¡pa quealsí
con piazos asín de pellejo!
¡Mentira paecí
que la gracia que tieni el tío Cleto
pa los males no le haiga servio
pa acertalmi con estí que tengo!
El domingo me jici el valienti
y me jui p'al güerto
con que a esparegilme
y a jacel p'allí ná do provecho.
¡Cuidaito que jui despacino,
como ustés cuando van a paseo!
Pus me pusí a jacel unos bochis
pa tiral cuatro jabas en ellos,
y aquello eran ansias,
y sudores, ajogo y mareos...
que si asín acontino, me caigo,
rëondo allí mesmo.
Y me viní pa casa ajogao,
sin poel ni siquiá con el cuerpo,
acezando por esas callejas
lo mesmo que un perro,
chúngala mandrángala,
que tardé media tardi lo menos.
¡Me caso en la luna!
¡Miusté a vel, por favol, señol médico,
si dicin los libros
que hay algo pa esto!
Pero no me dé usté más papelis
de esos polvos negros
porque cuasi me estoy provocando
n'amás que los miento.
Ni me jaga mercal más botellas
del constituyenti, porque no poemos,
y además, que eso n'amás sirvi
pa sacadinero.
¡Mentira paecí
que los libros no enseñin remedios
pa una cosa tan simpli, tan simpli
como esta que tengo!
¡Yo no sé pa qué está la botica
de cacharros tapá justa el techo!
¡Miusté a vel sí hay quiciás una untura
miusté a vel si hay quiciás un ungüento,
bien juerti, bien juerti,
que ajondi en el pecho,
que chupi, que saqui
lo que tengo dañao aquí aentro
que esti mal es asín como un bicho
agarrao en el güeco del cuerpo:
me chupa la sangri,
me atapona el gañon y por eso
tengo esta flojera
y estí ajogaero!
Receti esa untura,
receti ese ungüento,
que no haiga nenguno
mas juerti y más recio...
¡A vel si de golpi
o me pongo pirongo o espeno!...

LA EMBAJADORA





Pablos; aquí te lo traigu,
aunque sepa que me avientas
y me das ondi lo oiga
pa que a tu casa no güelva.
Mal jarás, si asín lo jacis,
que ná te ofendo aunque venga
sin mandálmelo a traelti
loque a tí te perteneza.
Y pa sabel que esto es tuyo
no es menestel dil a'scuela,
ni ojus cuasi jacin falta,
se sabí cuasi que a tientas.
Jéchale p'acá de golpí
una mirá tan siquiera,
que vas a velti pintau
cuantis esti mozu veas.
Mira tú a vel si estos ojos
vivinos como candelas,
mira tú a vel si esta frentí,
y asti pelo, y estas cejas,
y esti corti de semblanti,
y esta carina morena
no dicin que son de Pablos
cuantis de golpe se vean.
¡Si esto es tu mesma presona
jecha una miaja pequeña!
Pué que no jaga una hora
que nacio quiciás ni medía,
y yo ije: a jatealo
pa que su padrí lo vea,
y asina los cargos se jaga,
porque es hombrí de vergüenza
y no ha de querer quëala
asín a la pobre aquella,
ni ejal perdio a estí mozu
masao con su sanyri mesma.
Dici la genti galrona
que no te casas con ella
porque te has esconfiao
namás de vel a su puerta
dos o tres vecís de nochí
a Gapitu nl de tía Petra.
¡Quita pá'allá! ¡Pa él estaba
prepará la moza esa,
que el querel que te ha tenío
la ha jechu estal como ciega!
Esu lo jizu Gapitu
pa que la gentí creyera
que andaba metio en el ajo
y perdiese el crédito ella
y tú plantá la ejaras
pa vengalsi el sinvelgüenza
de que hogaño quiso hablala
y cuasi no pudo vela.
Escupi, Pablus, escupi
la repunanza que tengas,
que como algo hubiese habío
ya Gapitu el de tia Petra
mos tendría a todos jartos
de alabancias y fachendas.
Y si entaviá te arreparas,
mira la carina esta
que no es más que una pintura
propiamente a ti espurecha...
¡Y a vel si hay genti que dudi
si se paece esta prenda
a Pablos, el de tio Quico,
u a Gapitu, el de tía Petra!
¡Ahí lo tienísl Dalí un beso
a la sangri de tus venas
y me icis qué le igo
a la pobri madri aquella,
que a naide quieri en el mundo
n'amás que a ti y a esta prenda.
¿Qué me dicis?
-Que le iga...
lo que usté decile quiera...
¡Que güeno..., que iré p'alanti...,
más por estí que por ella!...

En la izquierda la guitarra
la navaja en la derecha,
terciada la manta al hombro,
la faja encarnada, suelta,
la actitud provocativa,
la mirada descompuesta,
roja de rabia la cara,
ronca la voz y algo trémula,
así apostrofaba el mozo
más rumboso de la aldea
a cuatro o seis rondadores
que invadieron la calleja
donde el mozo le cantaba
cantares a su morenaz
¡Me caso en Reus! Los majos
que asín de mí se moflean
jechin el paso p'alanti
como el que jabla lo jecha.
Si alguno tiene asaúras
y halbeliá más que lengua,
jala p'alanti ahora mesmo,
que, al que de mi se grojea
sé yo jaceli una raya
pa embajo de alguna teta.
Sos tengo bien alvertío,
por ajuyir de quimeras,
que cuando yo jechí rondas
a la vera de esta reja
calli la boca quien pasi
pa que le salga la cuenta
y jaga que no ma visto,
y andi agúo y no se güelva,
que esta calli es pa mi solo
dendi que Dios anocheza.
Si en esi corru hay alguno
que quié que le dé en la jeta
y jaga un bochí y lo entierri
al mesmo pie de esta reja
pa cantli luego encima
lo que él cantali quisiera
a una mujel que le ajuyi
y a cá minuto lo avienta.
Si quié dil de golpe al bochí
eji el corru y acá venga,
y si el humol no le ayúa
y el miëdo le jormiguea,
ayuáli los del corru,
que pa tos acaso tenga.
Jala p'lanti los cinco,
que aunque sin naide me vea,
enjamás he rejilao
ampié la ventana ésta!"
Así dijo el bravo mozo,
Y a saltos como una fiera
lanzóse hacia los del grupo,
que, sin grande resistencia,
dejaron en un momento
despejada la calleja.
Tornó el mozo a la ventana
de la muchacha morena
y la guitarra pulsando
hirió con rabia las cuerdas,
y al aire lanzó esta, copla
con la voz un poco trémula:
"No le jurguis al león
que anda alreor de la jembra,
ni te enredis con el hombri
que canta al pie de una reja

LA CENEFICA





Yo no sé explicala
porque a mi se me enrea la lengua
con esas palabras que train los papelis
dendí las ciudaes dondí los imprentan,
pero he comprendío
que la reina la ha dao a Plasencia
una cosa asina -
como una "Cenéfica",
que es aspecia de un premio mu finu.,
porque jué mu güena
cuando los soldaus
vinon de la guerra.
Yo no pueo explical lo que es eso
que ha dau la reina;
pero no habrá ciudá en toa España
que más lo merezca.
Que lo igan, si no, Juan Berruga,
Goriu el de tía Petra,
Gelipí el Coneju
y el mediano de tía Macarena.
cuando los yanquisis
mos robaron las tierras aquellas,
p'allá estuvon éstos
pasando las penas.
Na más que de oílos contal sus trabajos
se queaba aginao cualisquiera.
¡Me caso en la luna,
qué jielis tan negras,
qué ajogos tan grandis,
qué vía tan perra
se pasaron los cuatro enfelicis
qn tan güenus eran!
Aquí se quearon
toas sus querencias,
aginás las madres y cuasi perdía
la miaja e jacienda,
que no da ni siquiá pa los pagos
cuantu que se afloja de bregal en ella.
Aquí, sin sabersi
si muertos ya eran
pa rezali siquiá un Padrinuestro
u jechali un responso en la iglesia,
y ellos, mentris tanto
pasando miserias,
sufri que te sufri,
pena que te pena,
rabia que te rabia,
brega que te brega...
Cuasi esnúos y muertos de jambri,
con el jato a cuestas,
¡vengas días sin miaja e descanso
y nochis de vela,
con el alma afligía de ansionis,
con el cuerpu jechito una breva
y la vía prendía de un jilo
abocaos cá instante a perdela!
¡Asín se queardn
como sanguijuelas!
Paecía mentira
que ellos mesmos jueran
los que andaban p'aquí más alegris
que unas pascualejas,
sanos, respingonis,
coloraos y llenos de juerza.
Daba gustu velos
cargal las janegas,
estronchal de tres golpis un leño
con la segureja,
amarral los novillus a uña,
tiral a la barra los días de fiesta.
Y vínon transios
con el propio colol de la cera,
sin ganas de groma,
sin chispa de juerza
y dañaos de adentro los cuatro
que al miralos doblaba las penas.
No traian ni un probi remúo,
ni siquiá una perra
pa mercal bouticas
u jacel una miaja merienda..
¡Juy, cómo llegaron
los cuatro a Plasencia!
¡Cascan todos si no ven tan prono
la quería ciudá de su tierra!
Unos siñoronis.
que viven en ella
los estaban al tren esperando.
¡Qué gentí más güena¡
¡Juy, Dios mio, si tos los señoris
juesin en el mundo como aquellos eran.
¡Juy, Dios mío, si toas las ciudades
se golviesen igual que Plasencia!
A tóos los jeríos
los curaban con cosas bien güenas,
y tenían también camas finas
pa acostal los maletos en ellas.
Llamaban un méico
p'aque allí los viera,
y le daban caldos
de güenas pucheras
y le icían también muchas cosas
pa quitalí una miaja la pena.
Y a los sanos tamién los trataban
con delicaezas,
y les daban tabaco y licoris
de esos güenos que tanto calientan.
Bien lo puede Plasencia decilo,
que si no es por ella,
más de cuatro sin ver a su madrí
cascan de cansera.
¡Qué bien jecho está eso que dicin
que jaci la reina
de dali esa cosa
que llaman "Cenéfica",
porque no habrá ciudá en toa España
que más lo mereza!
!Juy, si tós las siñoris del mundo
como aquéllos jueran!
¡Juy, si juesin también las ciudades
igual que Plasencia!...
.................................
¡Vivan los soldados!
¡Viva nuestra tierral
¡Vivan los señoris!
¡Viva la "Cenéfica"!

Leída en la velada organizada por la
Cruz Roja de Plasencia para celebrar la
concesión del título de "Muy Benéfica".
otorgado a esta ciudad por su humanitario
proceder con los repatriados de nuestras
guerras coloniales

El sol quemaba, y al mediar el día
interrumpió Francisco la faena:
una faena trabajosa y ruda,
menos propia de hombres que de bestias.
Y laxos ya los músculos de acero,
medio asfixiado, con las fauces secas,
limpiándose los ojos escaldados
y mascando el polvillo de la tierra,
a la sombra candente de un olivo
se dispuso a comerse la merienda:
un pedazo de pan como caliza
y un trago de agua... si la hubiese cerca.
-¡Y entávia gruñi el amo! -meditaba-.
Pus no sé yo que más jacel se puea
que trabajal jasta que el cuerpo dici
que aunque quiera no pué jacel más juerza.
¡Y gruñil! Y pa ganal los cuatru realis
es menestel queal jecho una breva,
y estrozalsí la ropa, y no traelsi
ni un cacho tajaina pa merienda
pa que el cuerpo no diga que no puedi
y se abarranqui con la carga a cuestas.
Y ahora menós mal que los jornalis
rejundin más, aunque suál me cuestan;
pero n'amás que pase el tiempo esti
con tres realis pelaos uno se quea,
jasta que espués la bellotera ayúe
y espués también la aceitunera venga,
pa que siquiera otro mesín poamos
sacal escasamenti la peseta.
Y luego... los tres realis, y el invierno
que se pué regilal sin cuasi leña
ni aceiti p'al candil ni ná de trigo,
que se poni a cincuenta la janega.
No quea más que el ajo de patatas,
si hay algo de cundio pa cocelas,
que no lo habrá si la mujel no sali
par áhi avelgonzá con la aceitera.
Yo podía robali al amo mesmo
bellotas y aceitunas pa vendelas,
y cosas de más vália que tieni
juera de casa y en su casa mesma.
Pa jacelo me sobran asaúras,
me sobra halbeliá, me sobra juerza,
pero dejaba perdia a la mi genti
sí en el ajo me cogin y me enrean.
¡Y aunque no! Ni mi padrí jizu eso
ni me ijo en jamás que lo jiciera,
ni aninantís he sio de la uña
niquieri la mujel que ahora lo sea.
¡Ni falta que jadia ni pensalo
con un jornal contino de peseta!;
pero súas y súas como un negro
y a ganalo algún mes cuantis que llegas.
¡Y asín tiene que sel! Yo no me arrocho
a jacel la brutá, más que me muera,
porque a mí no me sale la robaina
¡y antis me junda que me jaga a ella!
Seguiremos asín, como poamos,
aguantando, aguantando lo que venga,
jasta que ya se llenin las medías,
¡porque me gierí que el muchacho y ella
no se puean jartal de pan de trigo
ni un torresnino pa colalo tengan!...

Por aquí iba Francisco en sus pensares
cuando de pronto resonó ya cerca
el trote de la jaca que montaba
el amo que no daba la peseta.
Y ante Francisco, en ademán airado,
gruñó el verdugo con la voz muy seca;
"No quiero jornaleros comodones
que a la sombra tan frescos se me sientan,
ni señoritos finos que se tardan
una hora en comerse la merienda.
La herramienta parada, tú sentado,
y luego, ¡que te paguen a peseta!
Te debo medio día, deja el corte
y a la noche te vas a por la cuenta."
No dijo más, y al trote de la Jaca
salió del olivar por la vereda.
Mirándolo Francisco como a veces
suele mirar al domador la fiera,
murmuró con la voz un poco ronca,
preñada de amenazas y algo trémula:
"¡Me caso en Reus!... ¡Lo que yo jaría
si el chico y la mujel se me murieran!..."