Nuñomoral - Caceres

PUEBLUH FANTAHMAH

¿ Dondi ha iu la via del pueblu que cuasi no quea ?
¿ Dondi han iu aquelluh seranuh de vinu y recena ?
¿ Dondi han iu lah guenah costumbrih y la genti seria ?
¿ Dondi han iu luh mozuh y mozah que jacian lah fiehtah ?
¿ Dondi han iu esuh pasacallih
de lah alboráh cantandu a lah puertah ?
¿ Dondi han iu lah que por lah tardih
a la resolana zurcian lah prendah
y cantaban coplah y cantarih de la vida mehma ?
Que tiempuh aquelluh que puei que no guelvan
ondi touh éramuh felicih con pan y tocinu,
nabuh con caritah, patatah con verzah
y unuh rejerviuh con grasa manteca
que cundimentaban pucheruh de granah
que sabían a gloria de lu que alimentan.
Agora veu luh puebluh vaciuh, si naidi a lah puertah
¡ Loh nuevuh san iu, no quea savia nueva !
¡ Lah callih vaciah, mu trihtih, mu muertah. !
¡ Son puebluh fantahmah, con genti mu vieja !
¡ Luh puebluh se muerin, se muerin de pena !
Ehtu ehta perdiu si nu se remedia.
¿ Que ehtará pasandu ?. Si ya no hay probeza .
Tenemuh de tou: cochih a la puerta,
telih, dvd, y lavavajillah, cajonih neverah;
carni touh luh diah, pahtah y legumbrih, marihcuh y pehca.
Lechi de toah clasih, con calciu y entera.
¡ Peru farta argu que ya nu nuh quea !
Farta humaniad, rehpetu y velguenza,
solidariá y algu de prudencia.
Son bienih preciosuh, que ya nu se enseñan.
Muh mata el ehtreh, la anguhtia muh ciega.
Vamuh a lu nuehtru, sin tenel en cuenta
que necesitamuh ehtal mah uniu.
y hay que abril la puerta
para que se llenin nuetruh corazoni:
De amol y juhticia de dicha y paciencia
Que touh a una se jace mah juerza.