" LA FABLA DEL LUGAR."

De José María Gabriel y Galan " Extremeñas"


LA FABLA DEL LUGAR


Cuando yo güelva al Pueblo y me diga
mi compadre Cerilo, el de Cleta:


-Pero escucha: ¿ pues andi has estao
pa que asina vengas
Fachendosu como un pavo güero
que de puru fanfarria se encrespa?
Pus hombri,paeci
como si te hubieran
jechu juez de estrución de repenti
pa jacel fachenda.

- Pus de Cáceres vengo, compadri.
¿ Te jaci algu de mella
el pensal si yo tengu o no tengu
genti de la güena
pa si se me ofreci
metel enfluencias?
Pues si estás rescocío por eso
dati con manteca,
porque naide te tieni la culpa
de que un naide seas
que no sabis n`amás
que ajuntar una miaja las letras,
tratal con el burro
dirte a la taberna
o chalral a bandujo de cosas
que no tienin cuenta.


-Hombre, no te igo
que ande bien de letra,
porque es cosa que no me ha tirao
ni siquiá cuando anduvi a la escuela;
pero mira, tamién arrempujo
si se ofreci metel enfluencias
polque el nuestru señol deputao
cuando vino a los votos ¿ te acuerdas?
se jué de jocicus
a mi casa mesma...
y al marchase me ijo: " Cerilo,
pide lo que quieras
por que ya te he dicho
que a tí se te aprecia"

-Calla, no me jablis
de las cosas esas
que n`amas de oilas
no me jaci coción la merienda
lo que el tu deputao queria
era que metieras
dentro de la urnia
la su papeleta.
¡ Vaya unos quereris
esus que mientas !
Los quereris de adentru, compadri,
son de otra manera....
y me obliga a decírtelo n`amas
que pa que lo sepas

Cuando yo a la Ciudá quía ahora
n`amás que quisiera
que hubiera golío
los convitis que me han jechu en ella,
n`amás porque dicin
que sé algo de letras
Unos siñorinis
que jablablan más finus que pelras
se ajuntaron asín que me vieron
jablaron con priesa
y le andaban diciendo a los otros
en la calle mesma;
¡ Señoris, señoris,
a vel que se piensa
que ha venío p´aca de las Jurdis
un muchacho que sabi de letras
que jaci aleluyas
que jaci comedias
que jaci unas coplas
jasta allí de güenas ¡"
" Pus a convialo !
Y que el hombri se jaga la cuenta
de que aquí solamente hay convitis
pa quien lo merezca
¡ Compadri, compadri !
N`amás que quisiera
que por un bujerinu bien chico
goliu lo hubieras
¡ Juy, Dios qué salota !
¡ Juy chico, qué mesas !
¡ Juy, Dios, qué comias !
¡Juy, qué güenas bebías aquellas !
¡ Juy qué cigarronis !
Los llamaban brevas
como aquí los nombran tos a lo jigos
mas tempranos que dan las jigueras
que ricus, compadri
¡ Aquello es canela,
y no los pitillos
de las pitilleras
que paeci que saben a istierco
y a jiel de la tierra
¡ Y vengan cafesis,
y vengan botellas
que estrumpían lo mesmo que tirus
y jacia el licol al vertelas
un espumarajo
que cocía de puru la juerza !
y luego compadri
¡ que lenguas aquellas
pa brindal y ponel pol las nubes
las cosas de letra !
Yo no pueo explical lo que dijon,
pero dijon tambien cosas güenas
de las coplas que jice hogañazo
pa imprentarlas en libro ¿ te acuerdas?
¡Compadri que gentis
tan finas aquéllas ?
que gentis tan listas
y tambien que güenas !
Los quereris de aquellos señoris
son quereris de adentru ¿ te enteras?
polque na te piden
ni na de tí esperan
y n`amás te quierin
polque dicin que sabis de letra,
y como ellus son listos, les gusta
que la genti sea lista y espierta,
polque mira, pa brutos ya bastan
entri gúeyis, guarrapos y bestias,
Y tú qué decías
cuando vias aquellas finezas
que han jecho contigo
pol sabel de letra?
-Pus compadri, pal caso, ni chispa,
polque yo pa decil cosas gúenas
paeci que me jacen
un ñuo en la lengua
Pero mira, compadri, te digo
que si yo te viera
dil el riu abaju
con la genti aquella
y a ti o a ellos n`amás
sacalus pudiera
te ajogas, compadri,
como rata vieja
aunque mil gorgoritos jicieses
pa querel conserval la pelleja......
¡ aunque en crus me pidiese socorro
la comadre Cleta !
¡ Ya ves tú si vendré agardecio
de la gente aquella !
N`amás una espina
me escarabajea
pa en dentru, pa en dentru
de las entretelas:
no poeli habel dicho a la genti
con palabras bien finas y güenas:
"" Señoris, que yo no merezco
toas esas querencias !
¡ Que Dios vos lo pagui
y que yo de verdá lo agraeza,!""