Esparragosa de Lares - Badajoz

CANTU A EXTREMAURA


Tous icin lo mesmu quéris probí
la más probí d'esta tierra,
que tu genti no tieni curtura
que no entiendin de cencia.

Más yo que te conozu desdi chicu,
que jui amamantau con tu sabia mesma,
que no tuvi sobraus pa jacel viajis
que no tengu estudius ni carrera;
hiju soy de campusinus;
campusinus castuós, peru sin juerza,
esquilmaus pol los ricus extremeñus
saqueaus pol los ricus d'otra tierra.

Obligau a emigral comu otrus muchus,
a röal pol lo anchu de la esfera
jui guipandu pol tos sitius otrus campus
jui guipandu sin querel otras laeras,
pol esu pueu icil juerti mu juertí
tu eris rica, rica, y fertil,
tierra muestra de los campus, extremeña,
tu ties sabia, tu ties sol, tu ties agua,
que son tres cosas esencialis;
n' envidias na de l'Europa
en 'a güerta y cerealis,
tamién ties cantidá de frutas
de cuasi toas las clasis,
grandis jesas pa crial ganau,
viñedus y olivaris.

Y que me icin del tabacu
que tu sola proucis sietí partis,
y ajuntandu las demás provincias
proucin las otras tres restantis.

Y la lus eletricá qu'exportas,
sin contal las centralis nuclearis
que mus las an endilgau a pesar nuestru
los ricus d'otras partis.
pol el viciu egoista d'esta gentí
que tié d'amontonar realis;
sin importalris pocu ni muchu
el dañu que mus jacin,
pos igan lo que igan, pol algu sera
qu'esus chismis no los quieri naidí;
pa mi qués verdá que contaminan,
que jacin de los campus erialis,
que son peligrus enormis
pa la tierra, los hombris y animalis.

Y sino que m'expliquin d'una vez
el porque, de no querellas naidi.

Icin tamién, que no tienis curtura,
que tu genti son comu salvajis.

Y estú es verdá, si pol curtura entiendin
abel leiu a Don Quijotí,
abel montau ena'eroplanu,
abel viajau pol el mundu,
conocer los famosus d'antañu,
diferencial un Goya d'un Picasu,
entender d'arti romanu,
o pairal más qu'un sacamuelas
de cualquiel tema mundanu.

Esta es la curtura de los ricus
la curtura qu'ellus inventarun,
estudiandu pa jacer negocius
buscandu la jorma de robarnus;
pos les tiení mucha cuenta que palremus
d'asuntus bien lejanus,
mientras ellus de forma ladina
mus dejan la paja, y se llevan el granu.

Yo piensu qu'estu no es curtura,
qu'estu es almacenar conocimientus,
es tener un'archivu en la mollera
y no saber nunca, d'adondi sopla el vientu.

La curtura a d'estar más jonda,
a d'estar carga de sentimientus,
es vivir con humildas
y que salga tó de mu padentru;
es una jorma de concencia,
es pairal con amor de los demás
manque s'usin terminus de cencia.

Extremahura si tiení curtura,
curtura propia, campusina
jecha con suoris y con tierra,
con 'l toscu pairal de los labriegus
arreandu la yunta en l'era,
con 'l sol qu'achicharra en el veranu,
con 'l verdi germinal de primavera,
con las comias campestris
en tiempu de sementera,
con 'l locu chilrial de los grillus,
con su gentí cansa peru contenta.

Uséa, que n' es lo mesmu
no tener curtura,
o que la genti estudiosa y mu leia
sea incapaz de comprender,
lo qu'es una curtura campusina.

david 6 1979


https://ww.ctv.es/USERS/daviddelgado/

DIOS ES UN INBENTU

Pairi vuestru que estás
pai pal cielu,
tan altu tan altu
que ni un pirucuto,
te estolba pa belmus.

Aquí, a tí te bendin
comu argú etelnu,
comu lo más sabiu,
lo más poerosu
comu lo más güenu.

Tú que to lo vides
sin gafas d'aumentu,
tú que to lo pueis
con movel un deó,
tú qu'eris más güenu
quel pan que comemus.

Esu icin de tí,
de tí icin esu.
Del dichu a la verdá
siempri hubu güen trechu.

Apeate del burru
baja aquí un ratinu,
enchufa la teli
mirala un poquinu.

Pué qu'asi tenteris,
comu esta esti mundu
comu están sufriendu,
millonis de seris.

¡Fijatí!
en loh muchachinus
qu'están sin cobiju,
sin pairi ni mairi
ni siquía un amigu.

!Fijatí!
en aquellus que sufrin,
de calol o friu
y tamien de jambri,
sin ná pa comel
sin poel tapalsi.

¡Fijatí!
las tierras sequinas
polque nunca lluebi,
ná puein sembral
ná naci, ná se muebi.

¡Fijatí!
otras enchalcas
lluebi que te lluebi,
jadiendu destrozus
sin paral en mientis.

¡Fijatí!
lah gerras y lah epidemias
to el mal que y'an jechu,
i seguin jadiendu,
sinqui aconsigamus
ponelli un remeyu.

¡Fijatí!
el volcan comu escupi,
fuegu, laba y destroción,
fijati en los terremotus
lo dejan arrasau to,
tamien loh bientus mu juertis,
¿tú loh jicistes?. !O no¡

Y endispues de estu
piensa un poquininu,
tú tan poerosu
tú tan sabijondu
tú tan super güenu.

Comu del sumun perfectu
una cosa asin salió,
¡jicistis una chapuza!
¿o jué con mala intención.?

Yo, que no soy sabiu
poerosu, ni güenu,
solu soy un jombri
ni a DIOS me parezu,
daria con gustu la mi via
pa encontral un remeyu.

Tú que to lo pueis
no lebantas ni un deó,
¡quizías no pueis jacellu!
¡quizías no eris tan sabiu!
¡quizías no eris tan güenu!

Y no quieru oil,
estorias felosoficas,
maturrangas ni cuentus,
¡se puei o no se puei!
¡se jaci o no se jaci!
¡s'es güenu o no s'es güenu!

david 11/99