Boquerizu - Asturias

Cuatro fíes tenía Telvona de Pión,
les cuatro más fées que llar sin panchón;
que llar sin panchón
o fabes sin sal,
de todes maneres p´al casu ye igual.

Pasaben los años y no había d´a qué,
pos ningún mozacu a rondiales jué;
a rondiales jué,
y no hay que pensar
que jueren les moces a un mozu rondiar.

Como a más de fées, taben sin un rial,
yera muncha albarda pa pocu costal;
pa pocu costal,
pos fáiseme a mí
que ye gordu entamu sin haber d´aquí.

Que pa vestir santos diben a quedar
ye lo que la xente dábase a pensar;
dábase a pensar
y no en sin razón
ya qu´el tiempu cuerre como xalación.

Mas yera un oficiu flacu pa vivir;
munches yeren cuatro pa santos vestir;
pa santos vestir,
pos un solu Cristu hay en el llugar.

Asín que Telvona dióse a cavilar
en lo que faría pa poder casar,
pa poder casar,
si cabe con bien
a les cuatro fíes, en un santiamén.

Como yera viuda y non taba mal,
metióse-i n´a chola un trucu xenial;
un trucu xenial
con munchu güen fin;
atrapar a un vieyu, chochu y con coxín.

Xustamente, a pocu, de plata cargau
allegó un indianu tou perniquebrau;
tou perniquebrau,
mas tan señorón
qu´un vuelcu a Telvona dió-i el corazón.

Finxió carantoñes y dengues sin fín
qu´al diablu del vieyu ficieron tilín;
ficieron tilín,
y jué tan exprés,
qu´uncíos quedaron en menos d´un mes.

En todu el conceyu, muy prestu y veloz
que taba muy rica, corriose la voz;
corrióse la voz,
y no hay que decir
lo qu´esto a les fíes fizo-ios subir.

Y en menos qu´un gallu da un ki-ki-ri-ki,
les cuatro teníen un mozu tras sí;
un mozu tras sí,
y tós en tropel
diben como mosques en pos de la miel.

El trucu de Telva tan bien i salió
qu´en muy pocu tiempu les fíes casó;
les fíes casó,
y non del tó mal,
pos todes toparon con mozu formal.

Mas comu el indianu taba tan gastau
con el casamientu quedó escachinflau;
quedó escachinflau,
y tantu chifló
qu´al cabu d´un añu la pata estiró.

Y otra vez Telvona volvióse a enviudar
y todos sos xenros diéronse a suañar
con la partición,
pensando en les onces qu´el suegru dexó.

Mas com´un cavila y el Diablu dispón
topáronse todos cara al paredón;
cara al paredón,
pos hubo que ver
lo que dexó el vieyu; dexó-ios.....muyer.

Todes sos riqueces, todu el só filón
yera un cuentu chinu qu´invento el vieyón;
qu´inventó el vieyón
y fízolo bien;
si Telva jué llista, él juélo tamién.

Y´el casu que Telva les fíes casó
y muy descansada, solina quedó;
solina quedó
y non tuvo mal
al poner en xuegu su trucu <<xenial>>.


MATÍAS CONDE